Ողբերգական պատահարներ հանրապետությունում: Երեւան-Սեւան ավտոճանապարհին իրար են բախվել «Opel» եւ «Mercedes» մակնիշի ավտոմեքենաները։ Վթարի հետեւանքով մահացել է մեկ, վիրավորվել՝ 9 մարդ: Ուսանողների Երեւան տեղափոխող «Mercedes»-ը մերկասառույցի պատճառով դուրս է եկել հանդիպակաց երթեւեկելի գոտի եւ բախվել դեպի Սեւան ընթացող «Opel»-ին։ Մահացածը Գեղարքունիքի մարզի Վարսեր գյուղի 18-ամյա բնակչուհի Հռիփսիմե Գասպարյանն է: Նա Բրյուսովի անվան համալսարանի ուսանողուհի էր: Տուժածների թվում է նաեւ նրա եղբայրը՝ 20-ամյա Հրանտ Գասպարյանը:
Իսկ Արմավիր-Գյումրի ավտոճանապարհին տեղի ունեցած ավտովթարի հետեւանքով մահացել է Արմավիրի Ալաշկերտ գյուղի 22-ամյա բնակիչ Սմբատ Բաղդասարյանը: Նա Գյումրի էր մեկնում: Ոստիկանները երիտասարդի դին մեքենայից դուրս են գտել: Ավտոմեքենան դուրս է եկել ճանապարհի երթեւեկելի գոտուց եւ գլորվել՝ հայտնվելով դաշտում:
Կարել է բերանը՝ բողոքելով աշխատանքից ազատելու դեմ: Վարդենիսի բնակիչ Արմեն Երանոսյանը կարել է բերանը եւ Երեւանի Հանրապետության հրապարակում հացադուլ սկսել: Երանոսյանին շուրջ մեկ ամիս առաջ հեռացրել են աշխատանքից: Նա հարբած աշխատավայր է գնացել՝ Վարդենիսի ոսկու հանքեր, տնօրինությունը նրան տեսել է այդ վիճակում եւ ազատել աշխատանքից: Արմեն Երանոսյանն ամուսնացած չէ, ապրում է մոր եւ եղբոր հետ, սոցիալական ծանր պայմաններում:
Գործադիրն այսօր արտահերթ նիստ է հրավիրել՝ քննարկելու Կառավարության ծրագիրը: Օրակարգում երկու հարց կար՝ Կառավարության ծրագրին հավանության տալու ու այն Ազգային ժողով ներկայացնելու մասին: Արտահերթ նիստի մասնակիցները հավանության են արժանացրել ծրագիրը: Այն Ազգային ժողովում քննարկվելու է հոկտեմբերի 20-ի արտահերթ նիստում:
ԵԱՀԿ Միսնկի խմբի համանախագահները տարածաշրջան կայցելեն հոկտեմբերի երրորդ տասնօրյակի ընթացքում։ Եռանախագահները լինելու են Բաքվում, Երեւանում եւ Ստեփանակերտում: Ռուսաստանցի համանախագահ Իգոր Պոպովը տեղեկացրել է, որ քննարկելու են Վիեննայի եւ Սանկտ Պետերբուրգի պայմանավորվածությունների իրականացման ընթացքը, բանակցային գործընթացի հեռանկարները: Պոպովը նաեւ հայտարարել է, որ հակամարտության կարգավորման գործընթացը միասնական փաթեթ է, եւ դրանից առանձին տարրեր առանձնացնելու ցանկացած փորձ ապակառուցողական է:
Լեռնային Ղարաբաղին ինքնավարության կարգավիճակ տալու մասին Իլհամ Ալիեւի հայտարարությունը՝ քննարկման թեմա Հայաստանում եւ Արցախում: ԼՂՀ նախագահի խոսնակի կարծիքով, սա ցույց է տալիս, թե Բաքուն որքան անպատրաստ է համապարփակ եւ երկարաժամկետ կարգավորման: Դավիթ Բաբայանը սա, այսպես ասած, «առաջընթաց» է համարում: Ասում է՝ եթե նախկինում Ալիեւը խոսքով եւ գործով փորձում էր ոչնչացնել Լեռնային Ղարաբաղը, հիմա արդեն ինքնավարության մասին է խոսում: Ամեն դեպքում՝ Ալիեւի հայտարարությունը Դավիթ Բաբայանի մոտ միայն ծիծաղ եւ խղճահարություն է առաջացնում։
Այդ մասին լրագրողների հարցին կատակով է պատասխանել նաեւ Էդուարդ Շարմազանովը, միաժամանակ Ալիեւին հիշեցրել, որ բանակցային սկզբունքներից մեկն ինքնորոշման իրավունքի իրացումն է, իսկ Արցախը որեւէ կարգավիճակով չի ցանկանում Ադրբեջանի կազմում լինել:
Վարչական դատարանը մերժել է «Բարգավաճ Հայաստան» եւ «Հայկական վերածնունդ» կուսակցություններից Գյումրիի ավագանու 4 թեկնածուների հայցը: Նրանք վիճարկում էին ավագանու ընտրություններից հետո մանդատների բաշխման վերաբերյալ թիվ 34 ընտրատարածքային ընտրական հանձնաժողովի կայացրած որոշումը: Այս ուժերը հայտարարել են, որ բոնուսային մանդատների բաշխման ժամանակ «Բալասանյան» դաշինքին լրացուցիչ երկու մանդատները տրվել են իրենց հաշվին, ինչի դեմ էլ բողոքում են: Օրենքով սահմանված կարգով ստացված բոնուսային մանդատներով «Բալասանյան» դաշինքը մեծամասնություն է կազմել ավագանիում, ինչից հետո Գյումրիի քաղաքապետ է ընտրվել դաշինքի ընտրացուցակը գլխավորող Սամվել Բալասանյանը: Հավելենք, որ ԲՀԿ-ն, «Հայկական վերածնունդ»-ն ու ԳԱԼԱ-ն հայտարարել են, որ շարունակելու են բոյկոտել ավագանու նիստերը՝ մինչեւ իրավական դաշտում խնդրի լուծումը:
Հոկտեմբերի 18-ին դոլարը շարունակել է արժեզրկվել, իսկ եվրոն ու ռուբլին ամրապնդել են դիրքերը: Արդյունքում դոլարի փոխարժեքը կազմել է 475 դրամ, եվրոյինը՝ 523, ռուբլունը՝ 7 դրամ 57 լումա, ֆունտինը՝ 584 դրամ։
Հանրապետության մի շարք շրջաններում թույլ ձյուն է տեղում: Մեղրիի լեռնանցքում խիտ մառախուղ է: Միջպետական եւ հանրապետական նշանակության ավտոճանապարհները բաց են, սակայն վարորդներին խորհուրդ է տրվում երթեւեկել բացառապես ձմեռային անվադողերով: Վաղ առավոտից արտակարգ իրավիճակների նախարարությունն ահազանգեր է ստացել, որ ճանապարհներին ավտոմեքենաներ են արգելափակվել: Վրաստանից էլ տեղեկացնում են, որ Վերին Լարսի անցակետը բաց է մարդատար ավտոմեքենաների համար՝ անվաշղթաների կիրառման դեպքում: Բեռնատարների համար անցակետը փակ է: Մաքրման աշխատանքներ են իրականացվում:
Հոկտեմբերի 19-ին հանրապետության շրջանների մեծ մասում տեղումներ են սպասվում, լեռնային գոտիներում, Լոռու, Տավուշի, Սյունիքի եւ Արցախի նախալեռնային հատվածներում՝ ձյուն: Օդի ջերմաստիճանն էապես չի փոխվի: Երեւանում վաղն անձրեւ է սպասվում: