Առողջության հավաստագրերի տրամադրմամբ պայմանավորված, Գյումրիի հիվանդանոցներում ավելացել է հիվանդների թիվը: Գյումրիի ինֆեկցիոն հիվանդանոցում գտնվող 19 հիվանդներից 15-ը մանկահասակ երեխաներ են, որոնցից 4-ի մոտ նկատվում է սուր ռեսպերատոր վիրուսային ինֆեկցիա:
«Դա լավ է, որ դիմելիությունը բարձրացել է, նախկինում երեխաներին պահում էին տանը, փորձում բուժել ոչ ամբուլատոր պայմաններում, քանի որ վճարել չէին կարող»,-NEWS am-ի թղթակցի հետ զրույցում ասել է Գյումրիի ինֆեկցիոն հիվանդանոցի տնօրեն Կարինե Տոնոյանը:
Մանկական Ավստրիական հիվանդանոցում 68 հիվանդից մոտ 50-ը 0-7 տարեկան երեխաներն են: Սովորաբար սուր ռեսպերատոր վիրուսային հիվանդություններով հիվանդանալու հավանականությունը ձմռանն ավելի մեծ է, քան` գարնանը: Այսօր հիվանդների մեծ թիվը մասնագետները պայմանավորում են դիմելիության բարձր մակարդակով:
«Հիվանդների թվի աճը պայմանավորված է այն հանգամանքով, որ պետությունը տրամադրում է առողջության հավաստագրեր, ինչը հնարավորություն է տալիս մինչեւ 7 տարեկանների բուժումն իրականացնել անվճար»,-ասել է Գյումրիի Ավստրիական մանկական հիվանդանոցի տնօրեն Աշոտ Կուրղինյանը::