«Ոսկե ծիրան» կինոփառատոնին միշտ լավ ծրագիր եւ հասարակություն է լինում: Այսօր` հուլիսի 14-ին, Երեւանում կայացած մամուլի ասուլիսում նման կարծիք է արտահայտել ռուս հայտնի կինոռեժիսոր Սերգեյ Լոզնիցան, որն արդեն երրորդ անգամ մասնակցում է «Ոսկե ծիրան» միջազգային կինոփառատոնին: Այս անգամ Լոզնիցան ներկայացրել է «Երեւանյան պրեմիերաներ» ծրագրում ներկայացված «Մթության մեջ» կինոնկարը:
Ինչպես պատմել է ռեժիսորը, «Մթության մեջ» կինոնկարը Վասիլի Բիկովի համանուն պատմվածքի էկրանավորումն է, որը մտահղացվել էր դեռեւս 10 տարի առաջ, սակայն ֆինանսավորման բացակայության պատճառով չի իրականացվել:
Պատասխանելով իր ֆիլմերի թեմատիկայի մասին հարցերին` ռեժիսորն ասել է, որ գոյություն ունեն գծեր, որոնցից պարզապես չպետք է անցնել: «Դուք կկանգնեք, քանի դեռ չեք ասել ճշմարտությունը, թեկուզ եւ ցավագին:Մանկությունից մեջս այնպիսի զգացողությունն է, որ ես ճիշտ տեղում չեմ: Ես չէի հասկանում` ինչ է կատարվում: Ինչու են մարդիկ ստում: Չէ որ այնքան պարզ է չստելը: Նման մանկական հարցեր մինչ այժմ էլ մնացել են», - խոստովանել է Լոզնիցան:
Ռեժիսորը նաեւ պատմել է, որ երբեք չէր կարող խաղարկային ֆիլմ նկարել, եթե չտեղափոխվեր Գերմանիա, որտեղ եւ գտել է պրոդյուսեր:
Հայրենասիրության մասին հարցին Լոզնիցան ասել է. «Ես ատում եմ հարենասեր բառը: Եթե ինչ-որ մեկը փորձում է այդ հասկացությունը փաթաթել քո վզին, ապա նա ուզում է քեզ օգտագործել: Ես մեկ մոլորակ ունեմ»:
Նշենք, որ «Ոսկե ծիրան» կինոփառատոնին Լոզնիցան մասնակցել է երկու անգամ` 2006 թվականին նա ներկայացրել է «Բլոկադա» փաստագրական կինոնկարը, իսկ 2010 թվականին` արժանացել է «Արծաթե ծիրան» հատուկ մրցանակին` խաղարկային կինոյի ժանրում:
Լոզնիցայի երկրորդ` «Մթության մեջ» ֆիլմն այս տարի Կաննի փառատոնում արժանացել է մրցանակի: