Համաշխարհային բանկը այսօր՝ հունվարի 21-ին հայտարարել է, թե համաշխարհային տնտեսությունը ներկայումս դուրս է գալիս ճգնաժամից:
ՀԲ-ն այսօր հրապարակել է «Համաշխարհային տնտեսական հեռանկարներ — 2010» զեկույցը, որում միաժամանակ նշված է, որ «էական անորոշություն» կա 2011 թվականի եւ հետագա տարիների համար:
Զեկույցի հեղինակներից Էնդրյու Բըրնսը զգուշացրել է, որ համաշխարհային ճգնաժամից առավել տուժած` Եվրոպայի եւ Կենտրոնական Ասիայի երկրների համար ճգնաժամի կրկնության վտանգը առկա կլինի առաջիկա տասնամյակում:
«Ազատություն» ռադիոկայանի փոխանցմամբ՝ Համաշխարհային բանկի գլխավոր տնտեսագետ Ջասթին Լինը, իր հերթին, շեշտել է, որ չնայած լավատեսական կանխատեսումներին` տնտեսական առողջացումը շատերն անմիջապես չեն զգա, քանի որ տնտեսության վերակառուցման եւ աշխատատեղերի վերաբացման համար տարիներ կպահանջվեն: