Թբիլիսի հայկական Մուղնեցոց Սուրբ Գեւորգ եկեղեցու փլուզումը Վրաստանի իշխանությունների կողմից հովանավորված քայլ էր։ Փետրվարի 15-ին լրագրողերի հետ հանդիպմանն ասաց Հայկական ճարտարապետությունն ուսումնասիրող կազմակերպության հայաստանյան գրասենյակի պատասխանատու, հուշարձանագետ Սամվել Կարապետյանը։ Վերջինիս համոզմամբ, եկեղեցին վերականգնելու վրացական իշխանության տված խոստումը կեղծ է։
«Եկեղեցին վերականգնելու խոստումը հերթական սուտ խոստումն է, որովհետեւ Մուղնեցոց Սուրբ Գեւորգից առաջ Թբիլիսիում գտնվող հայակական եկեղեցիներ վերականգնելու խոստումներ մենք էլի ենք լսել։ Հիմքեր ունեմ չհավատալու նաեւ այս հերթական խոստմանը»,- նշեց Սամվել Կարապետյանը՝ հավելելով, որ եկեղեցին աղյուսաշեն էր, իսկ այդպիսի եկեղեցիները սովորաբար անհնար է լինում վերականգնել։ Փլուզվելուց հետո աղյուսաշեն եկեղեցիները միանգամից վերածվում են հողակույտի։
Հիշեցնենք, որ 2009 թվականի նոյեմբերի 19-ին Թբիլիսիում փլուզվեց 1356 թվականին կառուցված Մուղնեցոց Սուրբ Գևորգ հայկական գմբեթավոր եկեղեցին: Հայկական կողմը բազմիցս ահազանգել էր եկեղեցու ահավոր վիճակի մասին։ Առաջին ճաքերը Սբ. Գևորգ եկեղեցու պատերին հայտնվել էին դեռևս 1980 թվականին, իսկ 1990 թվականին եկեղեցու շենքը դասվել էր վթարային շինությունների շարքին:
1763թ.-ից Մուղնեցոց Սուրբ Գեւորգ եկեղեցին հիշատակվում է որպես Հաղպատի թեմի մեջ մտնող Թիֆլիսի յոթ եկեղեցիներից մեկը։
