Ապրիլի 16-ին ԵՊՀ միջազգային հարաբերությունների ֆակուլտետում ջավախահայերին նվիրված քննարկմանը հրավիրված են եղել ՀՀ ԱԺ պատգամավորներ Շիրակ Թորոսյանը (ՀՀԿ) եւ Արծվիկ Մինասյանը (ՀՅԴ):
Շիրակ Թորոսյանն իր խոսում մասնավորապես նշել է, որ Ջավախահայերի իրավունքների պաշտպանության համակարգող խորհուրդը աշխատանքներ է տանում միջազգային կազմակերպությունների և գերտերությունների դեսպանատների հետ` նրանց առաջ բարձրացնելով ջավախահայության հիմնախնդիրները և նրանց իրավունքների պաշտպանության հարցը: "Մենք դիմել ենք ե՛ւ ՄԱԿ-ին, ե՛ւ ԵԽ-ին, ե՛ւ ԵԱՀԿ-ին, Հայաստանում ԱՄՆ դեսպանատանը եւ քայլեր ձեռնարկել՝ ԱՄՆ-ում հայկական լոբբիի ջանքերն ուղղորդելու նաև դեպի ջավախահայության խնդիրների լուծում,- ասել է նա:
Արծվիկ Մինասյանն էլ կարծիք է հայտնել, որ ջավախահայությունն իր բնօրրանում ենթարկվում է սոցիալական, տնտեսական ու քաղաքական իրավունքների ոտնահարման։ Նրա խոսքով, նաեւ վրացիների շահերից է բխում Ջավախքի նկատմամբ վերաբերմունքի փոփոխութունը, այնինչ վրացական իշխանությունների սխալ ընկալման հետևանքով ջավախահայության խնդիրները մնում են չլուծված:
Ըստ Ա. Մինասյանի, Ջավախքի հարցի հետ կապված խնդիրները ՀՀ իշխանությունները նախ պետք է բարձրացնեն միջազգային կառույցներում եւ հարկադրեն Վրաստանին կատարել իր ստանձնած պարտավորությունները: «Երկրորդ. Իրականացնել կոնկրետ ծրագրեր երկկողմանի համաձայնագրի հիման վրա սոցիալ-տնտեսական զարգացման, այդ թվում նաև այնպիսի ենթակառուցվածքների ձևավորման ուղղությամբ, որտեղ ջավախահայերն ազատորեն կարողանան ՀՀ և Վրաստանի որևէ տարածք հանգիստ և առանց խոչընդոտի գնալ-գալ, իրականացնել տնտեսական գործունեություն, բայց ամենակարևորը՝ քաղաքական իրավունքների երաշխավորություն։ Կարծում եմ՝ ՀՀ իշխանությունները Վրաստանի հետ հարաբերություններում կարող են և պետք է ձգտեն պաշտպանել հայ տարրի իրավունքները»,- ընդգծել է ՀՅԴ պատգամավորը:
