Հայկական բեռնափոխադրող ընկերությունները ժամանակավորապես դադարեցրել են ուղեւորությունները Ուկրաինա: Այդ մասին NEWS.am-ի թղթակցին հայտարարեց Հայաստանի բեռնափոխադրումների միության նախագահ, «Սաթի» բեռնափոխադրող ընկերության տնօրեն Մակար Առաքելյանը:
Նրա խոսքով՝ Հայաստանից Ուկրաինա բեռներ տեղափոխող մի շարք ուկրաինացի վարորդներ չեն լսել պայմանագրային հիմունքներով աշխատող հայ օպերատորներին եւ որոշել ավելի արագ ուղեւորվել Վերին Լարս:
«Մենք նրանց առաջարկեցինք այլ ճանապարհով գնալ, նախազգուշացրինք վտանգների մասին, սակայն նրանք նախընտրեցին արագ երթուղով գնալ եւ խցանման մեջ հայտնվել: Սակայն երեկվանից «Վերին Լարսի» երթեւեկությունը վերականգնվել է նաեւ բեռնատար մեքենաների համար եւ նրանք շարունակել են ճանապարհը», - նշեց Առաքելյանը:
Հիշեցնենք, որ Կազբեկ-Վերին Լարս ավտոմայրուղին մայիսի 17-ին մեկ ամսով փակվել էր սելավի հետեւանքով : Օգոստոսի 21-ին ճանապարհը կրկին փակվել էր սողանքի հետեւանքով:
