Ընդդիմադիր պատգամավոր Նիկոլ Փաշինյանի «Սահմանամերձ գյուղերի մասին» օրինագիծը ճիշտ նախաձեռնություն է: Այս մասին ասված է ՀՀ կառավարության սեպտեմբերի 18-ին ընդունած եզրակացությունում: Այնուամենայնիվ, եզրակացությունում նշվում է, որ նման նախաձեռնությամբ հանդես են եկել նաեւ այլ պատգամավորներ, այդ թվում՝ Կառավարությունն ինքը: Սրանից ելնելով՝ առաջարկվել է բոլոր նախաձեռնությունները միասին քննարկել:
Փաշինյանի օրինագծում սահմանամերձ են անվանվում այն համայնքները, որտեղ բնակելի կամ վարչական շենքերը Ադրբեջանի սահմանից մինչեւ 3 կմ հեռավորության վրա են գտնվում: Դրանց բնակիչների համար առաջարկվում է գազի, հոսանքի, խմելու եւ ոռոգման ջրի 50%-անոց արտոնություն սահմանել, ինչպես նաեւ ազատել հողահարկից եւ գույքահարկից:
Համայնքային բյուջեների պլանային դոտացիան նախատեսվում է փոխարինել կրկնակիով: Օգնությունը կարող է ծախսվել միայն Ավագանու որոշմամբ եւ բնակիչների բուժօգնության ու երիտասարդ ընտանիքների աջակցության համար:
Ադրբեջանական զինված ուժերից տուժած կամ ականի վրա պայթած բնակիչներին բուժօգնությունը պետք է տրամադրվի պետպատվերով:
