Հռոմում, սեպտեմբերի 19-ից մինչեւ հոկտեմբերի 1-ը բացվելու է «Արեւելքի առակները. Քրիստոնեությունը նոր հազարամյակի մարտահրավերների առջեւ» խորագրով լուսանկարների ցուցահանդեսը, որը ներկայացնելու է Մերձավոր Արեւելքի քրիստոնյա փոքրամասնությունների կյանքն ու առօրյան:
Ցուցահանդեսում ներկայացվում են Միքելե Բորզոնիի լուսանկարները, ով երկար ժամանակ ճամփորդել է ողջ Մերձավոր Արեւելքով եւ ծանոթացել է այնտեղի գրեթե բոլոր քրիստոնյա փոքրամասնություններին:
L’osservatore Romano թերթի փոխանցմամբ՝ ցուցահանդեսը ներկայացվել է Վատիկանում Հայաստանի դեսպանության եւ Մշակույթի հարցերով պապական խորհրդի հովանավորությամբ: Այն ներկայումս ցուցադրված է Հռոմի Վիտորիանո համալիրում, սակայն հետագայում ցուցահանդեսը ներկայացվելու է նաեւ Բրյուսելում, Ժնեւում եւ Նյու-Յորքում:
Բորզոնին երեք տարի անցկացրել է քրիստոնեական համայնքներում, ուստի լավ է պատկերացնում, թե ինչ խնդիրների են բախվում քրիստոնյա փոքրամասնությունները Մերձավոր Արեւելքում:
Նշենք, որ «Արեւելքի առակ. Քրիստոնեությունը նոր հազարամյակի մարտահրավերների առջեւ» անվանումը կրող ցուցահանդեսը կազմակերպվել է Ժողովուրդների բարեկամության ամենամյա փառատոնի շրջանակներում, Սուրբ Աթոռում ՀՀ դեսպանության նախաձեռնությամբ եւ նրա հովանու ներքո:
