Եվրասիական բարձրագույն խորհրդի կողմից որոշում է կայացվել ստորագրման ներկայացնել Եվրասիական տնտեսական միության ստեղծման մասին պայմանագրին Հայաստանի միանալու վերաբերյալ փաստաթուղթը եւ շուտով դա կիրականացվի: Այս մասին, այսօր՝ սեպտեմբերի 20-ին, «Հայաստան-Սփյուռք» 5-րդ համաժողովում իր ելույթում հայտարարել է ՀՀ ԱԳ նախարար Էդվարդ Նալբանդյանը՝ հավելելով, որ Մաքսային միությանը եւ Միասնական տնտեսական տարածքին միանալու Հայաստանի որոշումը պայմանավորված էր մեր երկրի տնտեսական եւ ռազմավարական շահերով։
Նալբանդյանի խոսքով՝ անցյալ նոյեմբերին Վիլնյուսում կայացած գագաթաժողովին Հայաստանը եւ ԵՄ-ն համատեղ հայտատարարութամբ երկուստեք վերահաստատեցին փոխադարձ հետաքրքրություն ներկայացնող բոլոր հնարավոր ոլորտներում համապարփակ համագործակցությունը զարգացնելու եւ ամրապնդելու հանձնառությունը եւ մենք շարունակում ենք մեր աշխատանքները այս ուղղությամբ։
Հայաստանի ԱԳ նախարարն անդրադարձել է նաեւ ՀՀ արտաքին քաղաքականության այլ առաջնահերթություններին՝ նշելով.
«Նախորդ տարի Հայաստանը հաջողությամբ նախագահեց Եվրոպայի խորհրդի նախարարների կոմիտեում եւ Սեւծովյան տնտեսական համագործակցության կազմակերպությունում, որոնք էլ ավելի բարձրացրեցին մեր երկրի հեղինակությունը միջազգային ասպարեզում՝ եւս մեկ անգամ ընդգծեցին մեր դիվանագիտական համակարգի պատրաստականությունը՝ ստանձնելու եւ հաջողությամբ իրականացնելու միջազգային կարեւորություն ունեցող առաքելություններ:
Հայաստանը հետեւողական ջանքեր է գործադրում սերտացնելու իր ռազմավարական դաշնակցային հարաբերությունները Ռուսաստանի հետ, զարգացնելու բարեկամական գործընկերությունը Ամերիկայի Միացյալ Նահանգների, առավել ամրապնդելու համագործակցությունը հարեւան Վրաստանի եւ Իրանի հետ։ Հայաստանի մոտեցումը առանց նախապայմանների կարգավորելու հարաբերությունները Թուրքիայի հետ վայելում է միջազգային հանրության աջակցությունը։
Հայաստանի անվտանգության կարեւոր բաղադրիչ հանդիսացող Հավաքական Անվտանգության Պայմանագրի Կազմակերպության շրջանակներում մենք շարունակել ենք հանդես գալ կառույցի առավել ամրապնդմանն ուղղված նախաձեռնություններով:
Հետեւողական զարգացում է ապրել փոխգործակցությունը ՆԱՏՕ-ի հետ»:
