ՄԱԿ-ի գլխավոր քարտուղարի տեղակալ Հելեն Քլարքի Երեւան այցի ընթացքում քննարկվել են համատեղ ծրագրերը եւ հեռանկարային նախագծերը: Այս մասին սեպտեմբերի 29-ին հայտարարել է ՀՀ արտգործնախարար Էդվարդ Նալբանդյանը Քլարքի հետ համատեղ մամուլի ասուլիսում:
Ըստ Նալբանդյանի՝ Հայաստանը բարձր է գնահատում ՄԱԿ-ի հայաստանյան գրասենյակի գործունեությունը: Նրա խոսքով՝ անցնող 23 տարում՝ անկախացումից ի վեր, կազմակերպությունը հանրապետությանը աջակցություն է ցուցաբերել տարբեր ուղղություններով:
«Կայացել է կազմակերպության աշխատանքի վերաբերյալ կարծիքների փոխանակում, քննարկվել են գլոբալ խնդիրներ, միջազգային օրակարգը եւ ՄԱԿ-ի դերը: Կողմերը համակարծիք են եղել Մերձավոր Արեւելքում եւ Սիրիայում բռնության անթույլատրելիության հարցում», - նշել է նախարարը:
Իր հերթին Հելեն Քլարքը նշել է, որ բարձր է գնահատում Հայաստանի դերը եւ մասնակցությունը ՄԱԿ-ի գործադիր խորհրդի, ՄԱԿ-ի այլ մարմինների եւ կառույցների աշխատանքում: Քլարքն հատկանշել է Հայաստանի մասնակցությունը ՄԱԿ-ի խաղաղապահ առաքելություններում:
Հելեն Քլարքը նաեւ շնորհակալություն է հայտնել Հայաստանին սիրիացի փախստականներին աջակցելու համար:
ՄԱԿ-ի գլխավոր քարտուղարի տեղակալը վստահեցրել է, որ կազմակերպությունը պատրաստ է աջակցել Հայաստանին զարգանալ այն ճանապարհով, որը կընտրի հանրապետությունը: Այս կապակցությամբ նշվել է Հայաստանի ընտրած ուղղության` տեղեկատվական եւ հեռահաղորդակցման տեխնոլոգիաների զարգացման կարեւորությունը
Պատասխանելով այն հարցին, թե այդ դեպքում ինչպիսին է տեսնում հետագա համագործակցությունը՝ հաշվի առնելով, որ ՄԱԿ-ի տարծաշրջանային գրասենյակը Սլովակիայից տեղափոխվել է Թուրքիա, Քլարքը հայտարարել է, որ կազմակերպությունը կհամագործակցի Հայաստանի հետ`իրենց հարմար ձեւաչափում: