Հայաստանի նախագահ Սերժ Սարգսյանն այսօր ընդունել է ՄԱԿ-ի Զարգացման ծրագրի (ՄԱԶԾ) կառավարիչ Հելեն Քլարկին:
Նախագահը բարձր է գնահատել ՄԱԿ-ի հայաստանյան գրասենյակի գործունեությունը, այդ թվում՝ ՄԱԿ-ի Զարգացման ծրագրի աշխատանքն անցած ավելի քան երկու տասնամյակում: Սերժ Սարգսյանը նշել է, որ տարբեր ոլորտներում իրականացված բարեփոխումների, դրանց արդյունքում արձանագրված դրական տեղաշարժերի, բազմաթիվ համայնքներում զարգացման ծրագրերի իրականացման գործում զգալի է ՄԱԿ-ի հայաստանյան գրասենյակի աշխատանքը: Հանրապետության նախագահը բարձր է գնահատել նաև անձամբ տիկին Հելեն Քլարկի ներդրումը:
Հանդիպմանը երկուստեք կարևորվել է ՄԱԿ-ի տարբեր կառույցների և հատկապես՝ ՄԱԶԾ-ի հետ Հայաստանի մշտական երկխոսությունն ու սերտ համագործակցությունը՝ ի նպաստ երկրի բարօրության: Հելեն Քլարկն ընդգծել է, որ ՄԱԿ-ի Զարգացման ծրագիրը Հայաստանում է՝ հաստատակամորեն օժանդակելու երկրի զարգացմանը: Այդ առաքելության իրականացման և Հայաստան-ՄԱԿ զարգացման օժանդակության նոր շրջանակային փաստաթղթի մշակման նպատակով տիկին Քլարկը կարևորել է ՀՀ կառավարության հետ Հայաստանի զարգացման գերակայությունների քննարկումը:
ՄԱԶԾ կառավարիչը շնորհակալություն է հայտնել ՄԱԿ-ի և նրա տարբեր կառույցների գործունեությանը Հայաստանի ակտիվ և շահագրգիռ մասնակցության, այդ թվում՝ Կազմակերպության խաղաղապահ գործողություններին մասնակցելու որոշման համար: Հելեն Քլարկը շնորհակալություն է հայտնել նաև ՄԱԿ-ի փախստականների հարցերով Գերագույն հանձնակատարի գրասենյակին Հայաստանի հանգանակության և Սիրիայի ճգնաժամի հետևանքով այդ երկրից Հայաստան տեղափոխված հազարավոր սիրիացիների աջակցության, ՄԱԿ-ի նոր օրակարգի մշակմանը մասնակցելու Հայաստանի պատրաստակամության համար, որի մասին ՀՀ Նախագահը հայտարարեց Նյու Յորքում ՄԱԿ-ի գլխավոր ասամբլեայի 69-րդ նստաշրջանում:
Հանդիպմանը զրուցակիցներն անդրադարձել են նաև տարածաշրջանի խնդիրներին և մարտահրավերներին:
