Կոտայքի մարզի Հրազդան քաղաքում նախօրեին 5-րդ հարկի պատշգամբից ցած նետված 61-ամյա կնոջ՝ տիկին Ջուլիետայի արարքը ցնցել է նրա հարեւաններին: Նրանք NEWS.am-ին պատմեցին, որ զարմացած են, թե ինչպես կարող էր նման հավասարակշռված կինն ինքնասպան լինել:
«Հարվածի ձայնը լսվել է ամբողջ թաղամասում: Ինչքանով տեղյակ ենք, պատուհանի մոտ աթոռ էր դրել, բարձրացել ու նետվել, բայց հավատներս չի գալիս, որ Ջուլիետան կարող էր ինքնասպան լիներ: Շատ լավ, հավասարակշռված կին էր, լավ ընտանիք ուներ»,-պատմեցին հարևանները՝ նշելով, որ կինն ապրում էր որդու ընտանիքի հետ:
Հարեւանների խոսքով՝ 61-ամյա կինը առողջական խնդիրներ ուներ, երկար ժամանակ բուժում էր ստացել Երեւանում. «Կարծեմ ասթմա ուներ, բայց ինչքանով տեղյակ ենք, բուժվել էր: Թե հիմա հիվանդության պատճառով էր էդ քայլին գնացել, թե դժբախտ պատահականության հետեւանք էր, չենք կարող հստակ ասել, բայց որ նրա մահը շոկի մեջ գցեց բոլորիս, էդ հաստատ ա: Լավ տղա ու հարս ուներ, սոցիալապես էլ բարվոք վիճակում էին, ինքը թոշակառու էր, տղան էլ աշխատում է»,-ասացին հարևանները:
Ավելի վաղ NEWS.am-ը հայտնել էր, որ հոկտեմբերի 31-ին Հրազդանի Միկրոշրջան թաղամասի թիվ 225 շենքի 5-րդ հարկի պատշգամբից ցած է նետվել 61-ամյա մի կին: Նա, նախանական տեղեկություններով, ինքնասպանություն է գործել:
Հարուցվել է քրեական գործ, կատարվում է նախաքննություն: