«Ազատ դեմոկրատներ» կուսակցության անդամ Մասիս Այվազյանին եռյակը հավատ չի ներշնչում, նա չի էլ հետեւում նրանց գործունեությանը: Այս մասին NEWS.am-ի թղթակցի հետ զրույցում ասաց Մասիս Այվազյանը:
Նա նշեց, որ հոկտեմբերի 10-ը ոչնչով չի տարբերվել հոկտեմբերի 11-ից, ինչպես հոկտեմբերի 24-ը չի տարբերվել 25-ից եւ չի էլ տարբերվի դեկտեմբերի 31-ից: «Ազատ դեմոկրատների» անդամն ասաց, որ եռյակի գործունեությանը հետեւում է այնքան, որքան Բուրկինա Ֆասոյում ծավալված իրադարձություններին:
Հարցին, թե այդ հարթակում կանգնած են ձեր երբեմնի գործընկերները՝ Լեւոն Տեր-Պետրոսյան, Լեւոն Զուրաբյան, Արամ Մանուկյան, Մասիս Այվազյանն ասաց, որ թող իրենք իրենց հոգսերով տառապեն: «Մեր ճանապարհը վաղուց ընդհատվել է ու ինձ արդեն չի հետաքրքրում իրենց ճանապարհը»: Միթե Ծառուկյանի հետ նույն հարթակում կանգնած անձինք այդքան միամիտ են հարցրինք նախկին ՀԱԿ անդամին, Մասիս Այվազյանն էլ այսպես հակադարձեց՝ կարող է երկամի՞տ են: «Ես իրենցից հեռացել եմ, եթե հեռացել եմ, ուրեմն ինչ-որ մի բան էն չի եղել, ես խզել եմ իմ հարաբերությունները այդ մարդկանց հետ բոլոր առումներով եւ չեմ ուզում անդրադառնամ նրանց»,-ասաց Մասիս Այվազյանը: