Խարդախության եւ պետական գումարների յուրացման մեջ մեղադրվող` աշխատանքի և սոցիալական հարցերի նախարարության սոցիալական ապահովության պետական ծառայության պետ Վազգեն Խաչիկյանին պետք է արդարացնել կամ նշանակել նվազագույն պատիժ` այն պայմանականորեն չկիրառելով: Այս մասին այսօր` նոյեմբերի 27-ին, Կենտրոն եւ Նորք Մարաշ վարչական շրջանների ընդհանուր իրավասության դատարանում հայտարարեց ամբաստանյալի փաստաբան Ժորա Վարոսյանը` ներկայացնելով պաշտպանական ճառը:
Փաստաբանը պնդեց, որ դատաքննության ժամանակ չի ապացուցվել, որ իր պաշտպանյալը մեղավոր է ՀՀ Քրեական օրենսգրքի 178-րդ հոդվածի 3-րդ մասի 1-ին կետով, 179-րդ հոդվածի 3-րդ մասին 1-ին եւ 2 կետերով, 38-314-րդ հոդվածով:
«Իմ պաշտպանյալը Էդուարդ Վարժապետյանից պահանջել է վերադարձնել 29 մլն դրամը: Եթե Վարժապետյանն այդ գումարը տված լիներ, ապա կհիշեր արտարժույթն ու օրը, սակայն նա չի հիշում, որն ըստ իս` անհավանական է: Բացի դրանից` իմ պաշտպանյալը խարդախություն չի կատարել, եթե նույնիսկ որոշեք, որ այդպես է, ուրեմն դա պետք է դիտարկել` որպես յուրացում: Հետո չի եղել կազմակերպված խումբ, Խաչիկյանը այդ խմբի ղեկավարը չի եղել»,- ասաց փաստաբանը:
Նշենք, որ պաշտպանական ճառով հանդես եկավ նաեւ Վազգեն Խաչիկյանը, որն իրեն մեղավոր չճանաչեց:
Հիշեցնենք, որ ըստ մեղադրական եզրակացության՝ ՀՀ աշխատանքի և սոցիալական հարցերի նախարարության սոցիալական ապահովության պետական ծառայության պետ Վազգեն Խաչիկյանը ծառայության մի շարք պաշտոնատար և պատասխանատու անձանց հետ կազմակերպված խմբով 2006–2010թթ. ընկած ժամանակահատվածում, օգտագործելով իրենց պաշտոնական դիրքը, պաշտոնական կեղծիք կատարելու, այն է՝ կենսաթոշակի կասեցված վճարումը վերսկսելու վերաբերյալ վճարման իրավունք վերապահող կեղծ դիմումներ պատրաստելով կամ առանց այդ դիմումների վճարային ցուցակներում կենսաթոշակառուների ստորագրությունները կեղծելու միջոցով անհիմն ելքագրել և յուրացման եղանակով հափշտակել են իրենց վստահությանը հանձնված, մահացած կամ ՀՀ տարածքից բացակայող կենսաթոշակառուների վճարումը կասեցված կենսաթոշակի առանձնապես խոշոր չափերի, ընդհանուր՝ 267.266.000 ՀՀ դրամ գումար։ Դատախազը Վազգեն Խաչիկյանի համար պահանջել է 13 տարվա ազատազրկում, իսկ ամբաստանյալ Հովհաննես Գրիգորյանին ազատազրկել 6 տարի, 2 ամիս ժամկետով:
