Ոստիկանությունը հայտնաբերել է «Զվարթնոց» օդանավակայանում ռումբի մասին կեղծ ահազանգի հեղինակին։
Shamshyan.com-ի փոխանցմամբ, իսկ ոստիկանության «Զվարթնոց» օդանավակայանի ծառայողները ոստիկանության Երեւան քաղաքի վարչության, ոստիկանության Մաշտոցի բաժնի եւ Ազգային անվտանգության ծառայության աշխատակիցների հետ պարզել են կեղծ ահազանգ տվողին, ում հայտնաբերել են:
Այս պահին նա գտնվում է ոստիկանության Մաշտոցի բաժնում եւ իր քայլը պատճառաբանել է, ասելով՝ «Անտեր տղա եմ, ասի՝ զանգեմ, մի քանի տարի կտանեն՝ կպահեն: Հացը կտան, ջուրը կտան, քնելու տեղն էլ կունենամ»:
Ինչպես ավելի վաղ հայտնել էր NEWS.am-ը, փրկարար ծառայությունը նոյեմբերի 27-ին, ժամը 20.09-ին ահազանգ էր ստացել, որ «Զվարթնոց» օդանավակայանի գլխավոր մասնաշենքում պայթուցիկ սարք է տեղադրված:
Դեպքի վայր էին մեկնել հատուկ նշանակության փրկարարական աշխատանքներ իրականացնող կենտրոնի փրկարարական ջոկատը եւ «Զվարթնոց» օդանավակայանի պահպանության հատուկ հրշեջ ջոկատից 3 մարտական հաշվարկ: Տեղանքի զննման արդյունքում պայթուցիկ սարք չէր հայտնաբերվել:
