Նավթի գների հետագա անկումը կհանգեցնի նավթի թերթաքարային հանքերի ուսումնասիրման եւ արդյունահանման ուղղությամբ ներդրումների կրճատմանը: Այս մասին գրում է Համաշխարհային բանկի «Global Economic Prospects» պարբերականը:
Հոդվածի համաձայն, նավթի ցածր գներն ուժեղ հարված կհասցնեն սեւ ոսկու խոշոր արտահանող երկրներին: Հատկապես դա կազդի թանկարժեք նախագծերի վրա, ինչպիսիք են, օրինակ, նավթի տարբեր հանքավայրերի ուսումնասիրությունն ու շահագործումը:
Սակայն, ըստ պարբերականի, նաեւ դրական կողմ կա: Նավթի գների անկումը բարենպաստ ազդեցություն կունենա զարգացող սպառող-երկրների վրա: Նրանց համար դա կառուցվածքային բարեփոխումների խթան կդառնա:
Հոդվածի հեղինակները կարծում են, որ նավթի գների անկումը պայմանավորված է երկու հիմնական գործոնով: Ըստ ՌԻԱ Նովոստիի, նախ՝ պատճառը ցածր պահանջարկն է՝ բարձր առաջարկի համեմատ: Եվ երկրորդ՝ նավթի գծանշումների անկումը կապված է նաեւ աշխարհում տիրող աշխարհաքաղաքական լարված իրավիճակի, ՕՊԵԿ-ի երկրների քաղաքականության հետ, որոնք իրենց աշխարհաքաղաքական նպատակներն են հետապնդում: