Հինգշաբթի Մեծ Բրիտանիայում չեղյալ են հայտարարվել տասնյակ երկաթուղային եւ ավիաչվերթներ՝ հյուսիսային եւ արեւմտյան շրջաններում սկսված ձնաբուքի պատճառով:
Եղանակի պատճառով ամբողջությամբ դադարեցվել է Մանչեսթերի օդանավակայանի աշխատանքը, դիսպետչերները չվերթները տեղափոխում են այլ քաղաքների օդանավակայաններ:
Փակված են Դարեմի եւ Յորքշիրի ճանապարհները: Դադարեցվել է տասնյակ գնացքների երթեւեկությունը, փոխանցում է «ՌԻԱ Նովոստին»:
Ավելի քան 200 դպրոց է փակվել Շոտլանդիայում, Հյուսիսային Իռլանդիայում եւ Կամբրիայում: Մի շարք մարզերում խափանվել է բջջային կապը:
Բրիտանիայի օդերեւութաբանական բյուրոն նախազգուշացնում է, որ ձնաբքին եւ ուժեղ քամուն ենթակա նահանգների թիվը կավելանա: Դրանց ցուցակում կարող է հայտնվել նաեւ Լոնդոնը, որտեղ այսօր զգալի ցրտել է:
