ԵԱՀԿ Մինսկի խմբի համանախագահող երկրների պատվիրակությունների ղեկավարների տարածած հայտարարությունը հիմնականում կրկնում է ԵԱՀԿ արտգործնախարարների՝ Աթենքում արած հայտարարությունը։ Այս մասին NEWS.am-ի թղթակցի հետ զրույցում հայտարարեց «Բարգավաճ Հայաստան» կուսակցության պատգամավոր Նաիրա Զոհրաբյանը։
«Բոլոր այս հայտարարությունների հիմքում մեկ սկզբունք է ընկած. ղարաբաղյան հակամարտությունը պետք է լուծվի հելսինկյան ակտի դրույթների հիման վրա. դա ուժի չկիրառումն է, պետությունների տարածքային ամբողջականությունը, ինչպես նաեւ ժողովուրդների ինքնորոշման իրավունքը»,- նշեց նա։
Նաիրա Զոհրաբյանին զարմացնում է այն փաստը, որ միջնորդ երկրների ներկայացուցիչները, խոսելով սահմանին գրանցված միջադեպի մասին, հերթական անգամ հավասարության նշան են դնում Հայաստանի եւ Ադրբեջանի միջեւ։ «Չեմ կարծում, որ կոնկրետ գնահատականներից խուսափելով՝ կարելի է նպաստել հակամարտության խաղաղ կարգավորմանը։ Երբ Ադրբեջանը Հայաստանի, Ռուսաստանի եւ Ադրբեջանի նախագահների՝ սանկտպետերբուրգյան հանդիպումից հետո սադրանք է կազմակերպում Չայլուում, ապա լավագույն աջակցությունը կլիներ ոչ թե անորոշ ձեւակերպումներ տալը, այլ մեղավոր կողմի հանդեպ հստակ դիրքորոշումը»,- ասաց Զոհրաբյանը։
«Եկել է ժամանակը, որպեսզի Ադրբեջանի առաջին դեմքերի ռազմաշունչ հայտարարությունների վերաբերյալ միջազգային հանրությունը հստակորեն ձեւակերպի իր դիրքորոշումը»,- հայտարարեց Զոհրաբյանը։