Հարավային Կովկասում ճանաչողական այցի շրջանակներում փետրվարի 21-ին հնգօրյա աշխատանքային այցով Հայաստան էր ժամանել ԱՄՆ Միջազգային զարգացման գործակալության (ԱՄՆ ՄԶԳ) Եվրոպայի եւ Եվրասիայի հարցերով փոխտնօրենի պաշտոնակատար Սյուզան Կոսինսկի Ֆրիցը: Նա այցելել է մի շարք ԱՄՆ ՄԶԳ ծրագրերի իրականացման վայրեր եւ հանդիպել Հայաստանի կառավարության, քաղաքացիական հասարակության, զբոսաշրջության ոլորտի եւ գործընկեր կազմակերպությունների ներկայացուցիչներ հետ: Տիկին Ֆրիցը կառավարում է Եվրոպայի եւ Եվրասիայի 13 երկրներին, այդ թվում` Հայաստանին տրամադրվող ԱՄՆ ՄԶԳ օժանդակության 200 միլիոն դոլար արժողությամբ տարեկան բյուջեն:
ՀՀ վարչապետ Հովիկ Աբրահամյանի հետ հանդիպման ընթացքում տիկին Ֆրիցը կարեւորել է աջակցության երեք համաձայնագրերի շրջանակներում ԱՄՆ ՄԶԳ-ի եւ ՀՀ կառավարության միջեւ համագործակցությունը տնտեսական զարգացման, ժողովրդավարության (ներառյալ քաղաքացիական հասարակության) եւ կառավարման, ինչպես նաեւ առողջապահական ու սոցիալական բարեփոխումների ոլորտներում: Կողմերը քննարկել են ԱՄՆ-Հայաստան երկկողմ հարաբերությունները, ՀՀ կառավարության մի շարք ընթացիկ մարտահրավերներ ու առաջնահերթություններ, երկրի բարեփոխումների օրակարգը, ինչպես նաեւ բաց երկնքի քաղաքականությանը, հակակոռուպցիոն քայլերին, քաղաքացիական հասարակությանն ու ապակենտրոնացմանն առնչվող հարցեր: ՀՀ փոխվարչապետ Վաչե Գաբրիելյանի հետ քննարկվել են Հայաստանի տեսլականը եւ առաջընթացը Եվրասիական տնտեսական միության ինտեգրման գործընթացում, ինչպես նաեւ ՀՀ Միջազգային տնտեսական ինտեգրման եւ բարեփոխումների նախարարության ներկայիս առաջնահերթությունները:
Այցի շրջանակներում տիկին Ֆրիցը այցելել է ԱՄՆ ՄԶԳ կողմից ֆինանսավորվող մի շարք հաստատություններ, այդ թվում` Ագրոբիզնեսի ուսուցման կենտրոն, Երեւանի թիվ 2 գիշերօթիկ դպրոց եւ Վանաձորի Ինֆոտուն: ԱՄՆ ՄԶԳ պաշտոնյան նաեւ մասնակցել է կլոր սեղան քննարկումների քաղաքացիական հասարակության ներկայացուցիչների եւ զբոսաշրջության ոլորտի գործընկերների հետ: Այդ հանդիպումների ընթացքում քննարկվել են Հայաստանի քաղաքացիական հասարակությանը եւ հայ-թուրքական միջսահմանային զբոսաշրջության զարգացմանն ուղղված ԱՄՆ ՄԶԳ աջակցությունը:
Փոխտնօրենի պաշտոնակատար Սյուզան Ֆրիցի այցը նշանավորում է ԱՄՆ ՄԶԳ-ի երկու տասնամյակների համագործակցությունը Հայաստանի հետ: Հայաստանի կառավարության հետ ներկա համաձայնագրերի շրջանակներում ԱՄՆ ՄԶԳ-ի աջակցությունը Հայաստանին ուղղված է բարձրացնելու երկրի տնտեսական մրցունակությունը, նպաստելու քաղաքացիական մասնակցությանը եւ լրատվամիջոցների լայն շրջանակի հասանելիությանը, ընդլայնելու որակյալ առողջապահական եւ սոցիալական ծառայությունների հասանելիությունը, եւ օգնելու երկրի առավել անապահով քաղաքացիներին հաղթահարել աղքատությունը: