«Նուբարաշեն» ՔԿՀ-ի մոտ հնչած կրակոցների հետեւանքով երկու հոգու տեղափոխել են «Էրեբունի» հիվանդանոց»: Այս տեղեկությունը NEWS.am-ի թղթակցի հետ զրույցում ասաց «Էրեբունի» բժշկական կենտրոնի Վերակենդանացման բաժանմունքի ղեկավար Արմեն Մուրադյանը:
Նա նշեց, որ իրենց մոտ բերել են երկու երիտասարդի դի, նրանք մահացած են եղել մինչեւ հիվանդանոց բերելը: Ըստ երեւույթին՝ նրանք վիրավոր են եղել, այդ պատճառով էլ տեղափոխել են հիվանդանոց, թերեւս ճանապարհին են մահացել:
Ավելի վաղ հայտնել էինք, որ քիչ առաջ Նուբարաշեն համայնքում հնչել են կրակոցներ: NEWS.am-ի հետ զրույցում սա հաստատել են ոստիկանությունից՝ նշելով, որ ահազանգ են ստացել եւ այս պահին դեպքի վայր են մեկնել ոստիկանները՝ պարզելու տեղի ունեցածը: Նախնական տեղեկություններով մի քանի հոգի ինքնաձիգերով կրակ են բացել «Նուբարաշեն» ՔԿՀ-ի մոտ, որի հետեւանքով կա երեք զոհ:
Մեր տեղեկություններով, մեկը մահացել է տեղում, երկուսը՝ հիվանդանոցում: «Նուբարաշեն» ՔԿՀ-ի մուտքն արգելված է: Մեր աղբյուրների փոխանցմամբ՝ սպանվածներից մեկը քրեական հեղինակություն «Երրորդմասցի Լյովիկն» է, մյուսի անունը Դերո է: