Ռուսական ռազմաբազաները Հայաստանում տեղակայելու վերաբերյալ նման երկարաժամկետ (49 տարի) պայմանագրերի կնքումը չի բխում ոչ միայն Հայաստանի, այլ նաեւ տարածաշրջանի շահերից՝ NEWS.am-ի թղթակցի հետ զրույցում նման տեսակետ հայտնեց Լիբերալ Կուսակցության նախագահ, Հայ ազգային Կոնգրեսի անդամ Հովհաննես Հովհաննիսյանը՝ անդրադառնալով Հայաստանում ռուսական ռազմաբազաների տեղակայման մասին պայմանագրում կատարվող փոփոխություններին:
Նա նշեց, որ որեւէ սուվերեն երկրում մեկ այլ երկրի ռազմաբազաների տեղակայումը միշտ վտանգում է այդ երկրի ինքնուրույնությունը: «Ես կարծում եմ, որ որեւէ երկրում ռազմաբազա ոչ մի ստատուսով չպետք է լինի: Դա սուվերենության աստիճանի կորուստ է»,-նկատեց Հովհաննիսյանը: Նրա խոսքով՝ դինամիկ զարգացող տարածաշրջանում դժվար է կանխատեսել, թե ինչ հունով կընթանան զարգացումները, եւ սեփական երկրի տարածքում հզոր երկրի ռազմաբազա ունենալը կարող է հղի լինել վտանգներով: ՀԱԿ անդամի կարծիքով՝ նման փաստաթղթի ընդունմամբ, այսօրվա իշխանությունները փորձում են երկարացնել իրենց պաշտոնավարման ժամկետը: «Համաձայնելով երկարացնել ռազմաբազաների տեղակայման ժամկետը՝ ՀՀ իշխանությունները լուծում են կարճաժամկետ խնդիր՝ իրենց աթոռի հարցը: Եւ այդ փաստաթղթի ընդունումը սպասարկում է միայն գործող վարչակարգի շահերը, այլ ոչ թե երկրի ու պետության»,-նշեց Հովհաննիսյանը:
Ընդդիմադիր գործիչը նշեց, որ Հայաստանի իշխանություններն իրենց պաշտոնավարման ժամկետը երկարացնելու համար մինչ այդ այլ գործարքներ են իրականացրել՝ Ռուսաստանին վաճառելով երկրի ռազմավարական նշանակություն ունեցող օբյեկտները՝ կապը, էներգետիկան եւ այլն: Հովհաննիսյանն անդրադարձավ նաեւ պայմանագրի այն փոփոխությանը, ըստ որի՝ Հայաստանի տարածքում տեղակայված ռուսական ռազմաբազան Ռուսաստանի շահերից բխող գործառույթներից բացի, հայկական զորամիավորումների հետ համատեղ պետք է պաշտպանի նաեւ Հայաստանի անվտանգությունը: «Նման համաձայնագիր ստորագրելը միջազգային իրավունքի խախտում է: Սա մի խայծ է, որով Հայաստանի իշխանությունները փորձելու են հասարակությանը ներկայացնել, թե Ռուսաստանը մեր մեջքին է, մեզ տեր կկանգնի հարեւան երկրների հետ հարաբերություններում»,-նշեց Հովհաննիսյանն ու ընդգծեց. «Աստված մի արասցե, եթե պատերազմական իրավիճակում հայտնվենք, թղթի վրա գրվածը չի աշխատելու»: Ըստ ընդդիմադիր գործչի՝ Հայաստանի ԱԺ-ն առանց մտածելու կվավերացնի այդ պայմանագիրը, նույնը կանի նաեւ Ռուսաստանի պետդուման, քանի որ նախատեսվող փոփոխությունները բացառապես բխում են Ռուսաստանի շահերից:
Հիշեցնենք, որ Հայաստանն ու Ռուսաստանը մտադիր են արձանագրություն ստորագրել, որի համաձայն՝ Հայաստանում ռուսական ռազմաբազաների տեղակայումը երկարաձգվելու է առնվազն 49 տարով:
