![](img/news/26/63/49/default.jpg)
Եվրոպան հույս ուներ, որ Թուրքիան աշխարհամասին կօգնի հրաժարվել ռուսական վառելիքից, սակայն Անկարան այլ պլաններ ունի, գրում է Foreign Policy-ն։ «Թուրքիայի անիմաստ գազային խաղը», այսպես է վերնագրել ամսագիրը իր հոդվծաը։ Ավելի վաղ հայտնի էր դարձել, որ ռուսական «Գազպրոմը» որոշել է սկսել «Թուրքական հոսք» գազատարի ծովային հատվածի շինարարությունը։
Ինչպես գրում է FP-ն, Անկարայի համբերությունը, հնարավոր է, սպառվում է, քանի որ ԵՄ-ն ձգձգում է Թուրքիայի՝ Եվրամիությանն անդամակցելու հարցը, ինչի արդյունքում Եվրոպայի արտաքին քաղաքական առաջնայնությունները պաշտպանելու Թուրքիայի ցանկությունը թուլանում է։
Ինչ վերաբերում է «Թուրքական հոսքին», ապա այդ նախագիծը կարող է Կրեմլին համարձակություն տալ հարվածի տակ դնել Արեւմուտքի համար ծայրահեղ կարեւոր դաշինքը, որի վրա Եվրոպան աշխատել է տասնամյակներ շարունակ, եւ շուռ տալ էներգետիկայի եւ անվտանգության ոլորտում ողջ եվրասիական լանդշաֆտը, գրում է ամսագիրը։
Այլ կերպ ասած՝ Թուրքիան եվրոպացի էներգիա սպառողների համար միջնորդ կդառնա, եւ դա անհրաժեշտ առանցքային տարր կլինի Եվրոպայում իր էներգետիկ դիրքերը պահպանել ցանկացող Մոսկվայի համար, գրում է Gazeta-ն։
Եվրոպայի հետ Թուրքիայի խաղերը քաղաքականության կտրուկ փոփոխություն չէ, սակայն միաժամանակ դրանք դիսոնանս են առաջ բերում, ասված է հոդվածում։ Ըստ պարբերականի՝ Օսմանյան կայսրության անկումից հետո Անկարան հակված էր դեպի Արեւմուտք եւ աշխարհիկ բարքեր, սակայն 21-րդ դարի սկզբից այդ իրավիճակը սկսեց փոխվել, եւ Թուրքիան սկսեց ավելի սերտ հարաբերություններ հաստատել հարեւան մուսուլմանական պետությունների հետ եւ ձգտել Վաշինգթոնից եւ ՆԱՏՕ-ից անկախ քաղաքականության։ «Թուրքական հոսքը» կարող է համարվել որպես կուլմինացիոն կետ, եւ դա շատ ձեռնտու է Ռուսաստանին, գրում է ամսագիրը եւ հավելում, որ Մոսկվան արդեն 10 տարի է ճանապարհ է փնտրում՝ Եվրոպային ռուսական վառելիքից կախվածության մեջ պահելու համար։