Արմավիրի մարզի Մրգաշատ գյուղի բնակիչ, 41-ամյա Հովսեփ Սարգսյանը մեղադրվում է իր համագյուղացու սպանության մեջ:
Ոստիկանության լրատվական ծառայությունից հայտնում են, որ ոստիկանության Մեծամորի բաժնում ապրիլի 29-ին ահազանգ է ստացվել, որ Մեծամորից Հայկավան գյուղ տանող ճանապարհին առկա է դի:
Դեպքի վայր մեկնած օպերատիվ խումբը հայտնաբերել է Մրգաշատի բնակիչ Էդվարդ Մելիքյանի դին: Դիակի արտաքին զննությամբ՝ Էդ.Մելիքյանի գլխի եւ պարանոցի առաջային մակերեսի վահանաճառի շրջանում հայտնաբերվել են արյունազեղման ձեւով վնասվածքներ:
Ժամեր անց ոստիկանության աշխատակիցներին հաջողվել է պարզել, որ մահացածի ընտանիքը լարված հարաբերությունների մեջ է գտնվել գյուղացիներից Հովսեփ Սարգսյանի հետ:
Ապրիլի 30-ին Հովսեփ Սարգսյանը բերման է ենթարկվել եւ տվել խոստովանական ցուցմունք:
Նախապատրաստված նյութերով հարուցվել է քրեական գործ Էդվարդ Մելիքյանի սպանության դեպքի առթիվ՝ ՀՀ քրեական օրենսգրքի 104-րդ հոդվածի 1-ին մասի հատկանիշներով։
Հովսեփ Սարգսյանը կալանավորված է: Քննությունը շարունակվում է:
Մանրամասները՝ ոստիկանության պատրաստած տեսանյութում:
