Եվրամիության «Արեւելյան գործընկերության» ծրագիրն ուղղված չէ Ռուսաստանի դեմ. եթե Ռուսաստանն ավելի գրավիչ լիներ, հնարավոր է, ագրեսիա չէր կիրառի իր հարեւանների նկատմամբ: Այս մասին մայիսի 21-ին Ռիգայում «Արեւելյան գործընկերության» գագաթաժողովի մեկնարկից առաջ հայտարարել է Եվրոպական Միության նախագահ Դոնալդ Տուսկը:
Նրա խոսքով, չնայած ագրեսիային, նույնիսկ անցյալ տարվա պատերազմին, Եվրամիությունը նախկինի պես հավատարիմ է իր գործընկերների հետ համագործակցությանը:
«Այսօր ես վստահ եմ, որ «Արեւելյան գործընկերությունը» մեր ընդհանուր առաջնահերթությունն է: Երկրորդ՝ ԵՄ-ն ցանկանում է զարգացնել հարաբերություններն «Արեւելյան գործընկերության» բոլոր երկրների հետ: Եվ երրորդ, որ ամենակարեւորն է, մենք ցանկանում ենք նրանց օգնել՝ վերափոխել հասարակությունը, որպեսզի նրանք կայուն լինեն արտաքին ճնշումների նկատմամբ»,- ընդգծել է Դոնալդ Տուսկը: