Հայաստանի իշխանություններն ամենաշատը վախենում են զանգվածային անհնազանդությունից, որը ռեժիմին տապալելու միակ ճանապարհն է։ Այս մասին այսօր՝ մայիսի 25-ին, լրագրոսղների հետ հանդիպմանն ասաց «100-ամյակն առանց ռեժիմի» շարժման ներկայացուցիչ Գարեգին Չուգասզյանը:
«Ռեժիմը մեզ ցույց տվեց իրեն հեռացնելու ձևը՝ քաղաքացիական անհնազանդությամբ: Մեր շարժման ռազմավարությունը չի փոխվել, այն եղել է և մնում է ռեժիմին զանգվածային անհնազանդության միջոցով հեռացնելը, և այդ պահն արդեն հասունացել է»,- ասաց Գարեգին Չուգասզյանը՝ հավելելով, որ իրենք պատրաստ են համագործակցել բոլոր այն քաղաքական ուժերի հետ, որոնք որևիցե առնչություն չեն ունեցել մարտիմեկյան դեպքերին:
Նրա խոսքով՝ չնայած «100-ամյակն առանց ռեժիմի» շարժման անդամներն այժմ ազատության մեջ են, նրանք շարունակում են մնալ մեղադրյալի աթոռին:
«Մեր խափանման միջոցը՝ կալանքը, փոխվեց մեկ այլ խափանման միջոցով՝ ստորագրությամբ քաղաքից չբացակայելը, և մեր ամբողջ շարժումը դեռ մեղադրյալի աթոռին է նստած: Ռեժիմը փորձ արեց վերացնել մեր շարժումը՝ իր ստալինյան կարգերով: Սակայն արդյունքում շարժումը ձեռք բերեց ավելի մեծ հեղինակություն՝ ցույց տալով, որ կարող է համագործակցության ճակատը մեծացնել»:
Չուգասզյանի խոսքով՝ չնայած «100-ամյակն առանց ռեժիմի» շարժմանը չհաջողվեց ռեժիմին ծնկի բերել, բայց ռեժիմն էլ չկարողացավ շարժմանը ծնկի բերել:
