Ազատության հրապարակում հոսանքի թանկացման դեմ բողոքի արդեն 3-րդ օրը հացադուլ անցկացնող ակտիվիստ, «Բարեւ Երեւան» խմբակցության անդամ Դավիթ Սանասարյանին «Շտապօգնությունը» հրաժարվել է բուժօգնություն տրամադրել: Ազատության հրապարակում այս մասին այսօր՝ հուլիսի 8-ին, NEWS.am-ի հետ զրույցում ասաց նստացույցի մասնակից ազատամարտիկ Սուսաննա Մարգարյանը՝ նշելով, որ ինքը մի քանի անգամ զանգահարել է «Շտապօգնություն», որից հետո Շտապօգնությունը ժամանել է:
«3 օրվա մեջ «Շտապօգնությունը» ընդհանրապես չի մոտեցել: Երբ զանգահարեցի «Շտապօգնություն», ներկայացա, որպես ազատամարտիկ Սուսաննա Մարգարյան ինձ ուզում էին համոզել, որ տվյալ գործողությունը «Կարմիր խաչի» վրա է ընկնում»,- ասաց Սուսաննա Մարգարյանը՝ նշելով, որ դրանից հետո զանգահարել է «Կարմիր Խաչ», այնուհետեւ ահազանգել է նաեւ Առողջապահության նախարարություն, որից հետո եւս մեկ անգամ զանգահարել է «Շտապօգնություն», որից հետո նոր անձնակազմ է ժամանել:
Դավիթ Սանասարյանն NEWS.am-ի հետ զրույցում ասաց, որ ինքն իրեն լավ է զգում եւ չի պատրաստվում առայժմ դադարեցնել հացադուլը:
Նշենք, որ այս գիշեր Ազատության հրապարակում լուսացրել են մի քանի տասնյակ ցուցարաներ: Գիշերը միջադեպեր չեն գրանցել: Ազատության հրապարակում հսկողություն անցկացնող ոստիկանների թիվը մեծ չէ:
Հիշեցնենք, որ ոստիկանությունը հուլիսի 6-ին, ոստիկանությունը ցրել է Բաղրամյան պողոտան երկու շաբաթ փակ պահած ցուցարարներին, որոնք ավելի ուշ հավաքվել են Ազատության հրապարակում։ Ցուցարարները ցանկացել էին երթ անցկացնել, սակայն ոստիկանությունը չէր թույլատրել: Ցուցարարներից շատերը գիշերել են Ազատության հրապարակում: