Ցորենի միջազգային շուկայում հարաբերական հանգիստ է, թեեւ ուրբաթ օրվա գործարքներում առկա է գնի ոչ մեծ աճ։ Փարիզի ապրանքային բորսայում երեկ ցորենի 1 տոննայի համար վճարել են 216,25 եվրո (մոտ 278 դոլար)։ Ցորենի նկատմամբ պահանջարկն աճել է ԱՄՆ գյուղնախարարության հրապարակած կանխատեսումից հետո, ըստ որի ընթացիկ ագրարային տարում ցորենի համաշխարհային բերքը կնվազի 2,3 տոկոսով եւ կկազմի 645,7 մլն տոննա։ Շուկայում հայտնի է դարձել նաեւ, որ չեղյալ է հայտարարվել Ուկրաինայից եւ Ռուսաստանից Բանգլադեշին 80 հազ. տոննա ցորենի մատակարարման պայմանագիրը։ Այժմ ասիական այդ երկիրը փնտրում է նոր մատակարարներ։
Աշխարհի շատ երկրներ ներկայումս ձգտում են գնել ցորենի մեծ խմբաքանակներ։ Իտալիան, որ ցորենի խոշորագույն ներմուծողն է Եվրոպայում, ցորենի ներմուծումը ավելացրել է 11 տոկոսով։ Այդ երկիրն առաջին հերթին գնում է կոշտ ցորենի լավագույն սորտերը՝ մակարոնի արտադրության նպատակով։
Չիկագոյի բորսայում ցորենի գինը երեկ կազմել է 7,23 դոլար՝ 1 բուշելի դիմաց (27,3 կգ)։
Այս շաբաթ վերջապես թանկացել է հացը Մոսկվայում։ Հացարտադրողները դա պայմանավորել են ալյուրի թանկացմամբ։ Եթե հունիսին ալյուրի 1 կգ-ն արժեր 6,5 ռուբլի (մոտ 78 դրամ), ապա օգոստոսին՝ արդեն 13,5-14,5 ռուբլի (163-175 դրամ)։
Ըստ մեր տեղեկությունների՝ Երեւանում հացի գնի նոր թանկացումներ տեղի չեն ունեցել։ Սակայն հացի ու ալյուրի ներկայիս գները Երեւանում աշխարհում ամենաբարձրերից մեկն են։ Ալյուրը Երեւանում վաճառվում է միջինը կգ-ը 216 դրամով, կամ տոննան 580 դոլար։ Համեմատության համար՝ Ռուսաստանում դա 460 դոլար է, այդ սահմաններում են նաեւ գները Եվրոպական եւ Ամերիկյան մայրցամաքներում։
