Հայաստանում ստեղծվել է փաստաբանների խումբ, որի նպատակն է հասարակությանն իրազեկել Սահմանադրական բարեփոխումների թերությունների մասին։ Այս մասին այսօր՝ օգոստոսի չորսին, լրագրողների հետ հանդիպմանն ասաց փաստաբան Գեւորգ Գյոզալյանը։
«Խմբի նպատակն է հասարակությանն իրազեկել եւ ցույց տալ Սահմանադրական փոփոխությունների թերությունները։ Մենք ոչ թե պատրաստվում ենք առաջարկություններով հանդես գալ, այլ խնդիր ենք դրել՝ արդյոք հասարակությանն անհրաժեշտ են Սահմանադրական բարեփոխումներ, թե ոչ»,- ասաց Գեւորգ Գյոզալյանը։
Փաստաբանի խոսքով՝ Սահմանադրության նոր նախագծում լուրջ թերություններ կան, օրինակ՝ 2-րդ գլխում անձի կրկնակի դատապարտման վերաբերյալ։
«Բերեմ օրինակ. անձի նկատմամբ քրեական հետապնդում են իրականացնում, իսկ քննիչն էլ վատ է աշխատում, պաշտպանական կողմն էլ այնպես է աշխատում, որ տվյալ անձին արդարացնում են։ Բայց եթե այլ պաշտոնատար անձ եկավ, ապա նա կարող է ապացույցներ ձեռք բերել եւ արդեն իսկ արդարացված մարդուն նորից կանգնեցնել դատարանի առջեւ։ Սահմանադրության նոր փոփոխությամբ՝ այս հարցը կարող է լուծվել միայն քննիչի որոշմամբ։ Սա, իհարկե, լավ է, սակայն այն երկրի համար, որտեղ օբյեկտիվություն կա։ Մինչդեռ մենք խոսում ենք Հայաստանի մասին, որտեղ ամեն ինչ սուբյեկտիվ է»,- ասաց Գեւորգ Գյոզալյանը։
Մնացած թերությունների վերաբերյալ փաստաբանը հրաժարվեց խոսել՝ նշելով, որ առաջիկայում զեկույցի ձեւով հրապարակվելու է փաստաբանների խմբի կատարած հետազոտությունները. «Այնուամենայնիվ, պետք է նշել, որ 2005թ. փոխվեց Սահմանադրություն, հետո Սահմանադրական դատարանի կողմից եղան բազմաթիվ որոշումներ այս կամ այն օրենքի վերաբերյալ։ Եվ այսպես շարունակ, անընդհատ փոփոխություններ են լինում։ Անձամբ ինձ համար այս Սահմանադրությունն օրենսդրություն է հիշեցնում»։
Նշենք, որ հուլիսի տասնհինգին հրապարակվել են Սահմանադրության նոր նախագծի 1-7-րդ գլուխները։ Նոր նախագծով առաջարկվում է անցում կատարել կառավարման խորհրդարանական համակարգին։
