Բելառուսի նախագահ Ալեքսանդր Լուկաշենկոն մեկ անգամ եւս Կիեւին վստահեցրել է, որ իր հանրապետության տարածքից ոչ մի ներթափանցում դեպի Ուկրաինա չի լինի։ «Երբեք մեր տարածքից ոչ ոք չի հարձակվի Ուկրաինայի վրա, եթե դա չհակասի մեր շահերին, եւ եթե Ուկրաինան ինքը չհարձակվի Բելառուսի վրա։ Սակայն նման բան երբեք չի լինի։ Բելառուսի տարածքից Ուկրաինա ոչ մի ներթափանցում չի լինի»,- հայտարարել է Լուկաշենկոն բելառուսական լրատվամիջոցներին տված հարցազրույցի ժամանակ։
Քաղաքական գործիչը Բելառուսում ռուսական ռազմաբազաները համարում է «բացարձակ խաղաղ» եւ նշել, որ դրանք չեն կարող հարձակվել Ուկրաինայի վրա, գրում է «ՌԻԱ Նովոստի»-ն։
Նրա խոսքով՝ Դոնբասի հակամարտությունը ոչ ոք չի մոռանա, սակայն ժամանակի ընթացքում ամեն բան կխաղաղվի։ «Հասկանալի է, որ շատ ժամանակ է պետք, բայց այդ քայլերը պետք է արվեն։ Ժամանակ կանցնի, եւ Դոնբասը կլինի ուկրաինական այնպես, ինչպես դա ցանկանում են Ուկրաինայի իշխանությունները։ Ղրիմի հարցն ավելի բարդ է»,- հավելել է նախագահը։