![](img/news/28/38/25/default.jpg)
Սեպտեմբերին Նյու Յորքում Հռոմի պապ Ֆրանցիսկոսին կդիմավորեն ոչ միայն հազարավոր հավատացյալներ, այլեւ նրա 70 մետրանոց դիմանկարը՝ քաղաքի շենքերից մեկի վրա: Ինչպես հայտնում է Wall Street Journal թերթը, կտավի վրա աշխատանքը կավարտվի արդեն մոտ օրերս: Նկարի համար հիմք է ծառայել պապի այն լուսանկարը, որտեղ նա պատկերված է Վատիկանում՝ հավատացյալներին ողջունելիս:
Լուսանկարիչ Ջուլիո Նապոլիտանոյի կողմից 2015թ. մարտին արված լուսանկարի վերստեղծումով զբաղված է նկարիչների մի ամբողջ թիմ: Իրենց աշխատանքում նրանք օգտագործում են ձիու բաշից պատրաստված վրձիններ, փոքրիկ հոլաններ ու մոտավորապես 380 լ ներկ: Նկարին կից լինելու է գրություն. «Բարի գալուստ, Ֆրանցիսկոս պապ», նաեւ «հեշթեգներ» անգելերենով ու իսպաներենով, որոնց օգնությամբ սոցցանցերում հնարավոր կլինի հետեւել Հռոմի պապի առաջին այցին ԱՄՆ, հայտնում է ՏԱՍՍ-ը:
Ութերորդ ավենյուի եւ Մանհեթենի 35-րդ փողոցի անկյունում գտնվող շենքի խուլ պատը, որի վրա պատկերվելու է կաթոլիկ եկեղեցու առաջնորդը, արդեն մի քանի տարի է օգտագործվում է գովազդի համար: Ընդամենը մեկ շաբաթ առաջ այդ վայրում Cadillac CTS-V մարզական նոր սեդանի պատկերն էր:
Հռոմի պապի դիմանկարի վայրի ընտրոթյունը պատահական չէ . սեպտեմբերի 25-ին Հռոմի պապը պատարագ է տալու այդ շենքից երկու քայլ հեռավորության վրա գտնվող «Մեդիսոն սքվեր գարդեն» մարզա-ժամանցային համալիրում: Եվ այնտեղից պարզապես անհնար կլինի չնկատել թաղամասի վրա վեր խոյացող 68 մետր բարձրությամբ եւ 28 մ լայնությամբ դիմանկարը:
Կտավը շենքի պատի վրա տեղադրելու մտահղացումով հանդես էր եկել Բրուքլինի Հռոմեական կաթոլիկ միաբանությունը: Այնտեղից հայտնել են, որ պատկերը կպահպանվի վեց շաբաթ՝ Նյու յորքի բնակիչներին ու հյուրերին հիշեցնելով Հռոմի պապի այցի մասին:
Հռոմի պապ Ֆրանցիսկոսն իր առաջին այցը ԱՄՆ կսկսի սեպտեմբերի 22-24-ին, Վաշինգտոնից: Մայրաքաղաքից նա կուղեւորվի Նյու յորք, որտեղ նա սեպտեմբերի 25-ին ելույթ կունենա նաեւ ՄԱԿ –ի ամբիոնից, որից հետո կմեկնի Ֆիլադելֆիա, ու սեպտեմբերի 27-ին կլքի Միացյալ Նահանգները: