Հնդկաստանի հյուսիսարեւելյան Ասսամ նահանգում ջրհեղեղը խլել է առնվազն 26 մարդու կյանք,երեքշաբթի օրն այս մասին հայտնել է Times of India հրատարակությունը:
Ընդ որում միայն վերջին օրերին վեց մարդ է զոհվել: Ավելի քան 700 հազար մարդ է տուժել նահանգի 18 շրջաններում: Ջուրը ծածկել է ավելի քան հազար հեկտար գյուղատնետսական հողատարածք: Ջրի տակ է մնացել նաեւ Կազիրանգի ազգային պարկը, որտեղ խեղդվել է ռնգեղջյուրի ձագը:
«Երկուշաբթի օրվա դրությամբ ջրի տակ է Կազիրանգի 70 տոկոսը»,- հայտնել է հրատարակությանը այդ տարածքի անտառապահ Սիլ Սարման, հաղորդում է «ՌԻԱ Նովոստին»:
Ջրհեղեղները, որոնց պատճառը սեզոնային հորդառատ անձրեւներն էին,այս նահանգում սկսվել են մոտավորապես երկու շաբաթ առաջ: Ջեմաջի տարածքում Բրախմապուտրա գետը, դուրս գալով ափերից, ջրի տակ է թողել մի ամբողջ գյուղ ՝ 40 տներով: Իշխանությունները կազմակերպել են ժամանակավոր ճամբարներ, որտեղ ապաստան է գտել մոտավորապես 10 հազար մարդ: Նահանգի բնակիչները ջրից պաշտպանվելու նպատակով թաքնվում են նաեւ տաճարներում: Ասսամի որոշ շրջաններում ջրհեղեղի պատճառով չի գործում երկաթգծային հաղորդակցությունը:
