«Բաշնեֆտ» ընկերության բաժնեմասերի վաճառքի ժամանակ փողերի յուրացման եւ լվացման մեջ մեղադրվող գործարար Լեւոն Հայրապետյանի տնային կալանքի ժամկետը սեպտեմբերի 15-ին լրացել է։ Քննիչը կալանքի երկարաձգման համար դատարան միջնորդագիր չի ներկայացրել։
«Հայրապետյանի տնային կալանքի ժամկետը սեպտեմբերի 15-ին լրացել է։ Դատարանը միջնորդագիր չի ստացել»,- գրում է «Ինտերֆաքս»-ը՝ վկայակոչելով Մոսկվայի քաղաքային դատարանը։
Այսպիսով՝ քննիչները Հայրապետյանի նկատմամբ պետք է խափանման այլ միջոց ընտրեն, որը ազատազրկման հետ կապ չունի։ Դա կարող է լինել չհեռանալու մասին ստորագրությունը կամ պարտադիր ներկայանալը։
Ավելի վաղ Մոսկվայի քաղաքային դատարանը մինչեւ սեպտեմբերի 15-ը երկարաձգել էր Հայրապետյանին տնային կալանքի ժամկետը։ Հայրապետյանի նկատմամբ հարուցված գործը առանձնացվել էր «Բաշնեֆտի» վարույթից։
Հիշեցնենք, որ 2014թ.-ի հուլիսի 24-ին Ռուսաստանի Դաշնության Քննչական կոմիտեն հայ գործարար Լեւոն Հայրապետյանին մեղադրանք է առաջադրել ՌԴ քրեական օրենսգրքի 160-րդ (յուրացում կամ վատնում) եւ 174-րդ (անօրինական ճանապարհով ձեռք բերված միջոցների լվացում) հոդվածներով: Սեպտեմբերի 12-ին Լեւոն Հայրապետյանին եւս մեկ մեղադրանք է առաջադրվել մեքենայության հոդվածով: Հոկտեմբերի 3-ին Մոսկվայի Բասմանի դատարանը փոխել է «Բաշնեֆտի» գործի ֆիգուրանտ, հայտնի հայ գործարար Լեւոն Հայրապետյանի խափանման միջոցը՝ կալանավորումը փոխարինելով տնային կալանքով: