Մենք դատապարտում ենք կրոնի շահարկումը քաղաքական նպատակներով: Այս մասին, այսօր՝ հոկտեմբերի 12-ին, Մայր Աթոռ Սուրբ Էջմիածնում, Ֆրանկոֆոնիայի միջազգային կազմակերպության (ՖՄԿ) գլխավոր քարտուղար տիկին Միկայել Ժանի հետ հանդիպման ժամանակ նշել է Ամենայն հայոց կաթողիկոս Գարեգին Բ-ն:
Մայր Աթոռ Սուրբ Էջմիածնի տեղեկատվական համակարգի փոխանցմամբ, Գարեգին Բ-ն խորհրդանշական նկատել է, որ հայ ժողովրդի համար նվիրական` Հայոց Ցեղասպանության 100-րդ տարելիցի ոգեկոչման տարում, ՖՄԿ-ն իր համաժողովը կազմակերպում է Հայաստանում` այդպիսով յուրօրինակ պատգամ հղելով մարդկությանը` Հայոց Ցեղասպանության ճանաչման եւ նմանօրինակ ոճրագործությունների կանխարգելման համար:
Հանդիպման ընթացքում Վեհափառն անդրադարձել է Հայ Եկեղեցու ունեցած կարեւոր դերակատարությանը հայ ժողովրդի կյանքում, ինչպես նաեւ այսօրվա Ֆրանկոֆոնիայի մի շարք երկրների հետ միջնադարում հայության ունեցած սերտ աղերսներին: Այս առումով Նորին Սրբությունը ողջունել է արդի փոխգործակցությունը` վստահություն հայտնելով, որ այն երկուստեք կհարստացնի ՖՄԿ անդամակցող երկրներին:
Իր հերթին Միկայել Ժանը Ամենայն Հայոց Հայրապետին ներկայացրել է Հայաստանում գումարված Ֆրանկոֆոնիայի 31-րդ նախարարական համաժողովի արձանագրած արդյունքները, ՖՄԿ առաջիկա անելիքները եւ հրամայականները:
ՖՄԿ գլխավոր քարտուղարը կարեւորել է համընդհանուր ջանքերի միավորումը` հանուն մարդկային կյանքում առկա խնդիրների կարգավորման եւ մարտահրավերների հաղթահարման` դրանում էական նկատելով նաեւ մշակույթների եւ կրոնների երկխոսությունը:
Զրույցի ժամանակ անդրադարձ է եղել Մերձավոր Արեւելքում տեղ գտնող ողբերգական զարգացումներին, մասնավորապես քրիստոնյաների ծանր վիճակին, խոսվեց նաեւ հոգեւոր առաջնորդների կողմից գործադրվող խաղաղասիրական ջանքերի մասին:
«Մենք դատապարտում ենք կրոնի շահարկումը քաղաքական նպատակներով: Պատերազմ, ատելություն եւ անհանդուրժողականություն քարոզող կրոն գոյություն չունի: Բոլոր կրոնները քարոզում են սեր եւ խաղաղություն: Այդուհանդերձ, այսօր տեսնում ենք, որ կրոնական ծայրահեղական շարժումների պատճառով մարդկային կյանքում աղետներ են տեղի ունենում», - նշել է Գարեգին Բ Կաթողիկոսը: