![](img/news/29/06/25/default.jpg)
Վանաձորի զորամասերից մեկում հոկտեմբերի 8-ին քացախաթթվի մեծ չափաբաժին օգտագործելու հետեւանքով թունավորման նախանշաններով Երեւանի Հանրապետական հիվանդանոց տեղափոխված 19-ամյա Վահան Մովսիսյանը բուժում է ստանում Երեւանի կայազորային (Կանազի) հոսպիտալում:
«Քացախաթթու խմելու հետեւանքով այրվածքներ է ստացել զինծառայողը, սակայն ամբողջովին ապաքինվելու է, այդ մասով հանգիստ ենք: Մեզ ավելի շատ անհանգստացնում է նրա հոգեկան վիճակը, որի վերաբերյալ եզրակացություն կարող ենք տալ միայն վերջնական հետազոտությունից հետո՝ 1 ամիս անց»,- NEWS.am-ի թղթակցին ասաց հոսպիտալի պետը:
Զինծառայողի դեպքով այժմ զբաղվում է ռազմական ոստիկանությունը:
Ավելի վաղ հայտնել էինք, որ Վանաձորի զորամասերից մեկում 2015թ. հոկտեմբերի 8-ին ժամը 16:00-ի սահմանում սննդային թունավորման նախանշաններով Վանաձորի բժշկական կենտրոն է տեղափոխվել զինծառայող, ծնունդով արտաշատցի 19-ամյա Վահան Մովսիսյանը: Բժիշկները պարզել են, որ զինծառայողը թունավորվել է քացախաթթվի մեծ չափաբաժին օգտագործելու հետեւանքով: Տուժածին ծանր վիճակով Վանաձորի բժշկական կենտրոնից շտապօգնության մեքենայով տեղափոխել են Երեւանի «Արմենիա» ԲԿ: