Չինական Տյանցզինում դատավարություն է սկսվել ՉԺՀ Հասարակական անվտանգության նախարարի նախկին տեղակալ Լի Դոնգշենգի հանդեպ, որին մեղադրում են 22 միլիոն յուան կաշառք ստանալու համար (3,5 միլիոն դոլար)։
Նախկին պաշտոնյային նաեւ մեղավոր են համարում պաշտոնեական լիազորությունները չարաշահելու համար։ Լիի վերադասը՝ Չինաստանի Հասարակական անվտանգության նախկին նախարար Չժոու Յունկանը այս տարվա հունիսին ցմահ բանտարկության է դատապարտվել, փոխանցում է BBC-ի Ռուսական ծառայությունը։
Այս շաբաթ Չինաստանում դատարանը 16 տարվա ազատազրկման է դատապարտել Չինաստանի խոշորագույն Petro China նավթագազային հոլդինգի նախկին ղեկավար Ցզյան Ցզեմինին 2,2 միլիոն դոլար կաշառք վերցնելու համար։ Չժոու Յունկանին համարում են նրա միջնորդը։
Յունկանի դեմ գործ էր հարուցվել անցյալ տարվա դեկտեմբերին՝ ՉԺՀ նախագահ Սի Ցզինպինի կարգադրությամբ։ Այդ կոռուպցիոն սկանդալի մասնակից է համարվում նախկին նախարարի մերձավոր շրջապատից 300 մարդ։ Նրանց թվում են Յունկանի հարազատները, ենթակաները եւ զինակիցները, ինչպես նաեւ CNPC կորպորացիայի ներկայացուցիչներ։
ՉԺՀ նախագահ Սի Ցզինպինը նախկինում հայտարարել էր, որ Չինաստանում կոռուպցիան այնպիսի ծավալներ է ձեռք բերել, որ արդեն սպառնում է իշխող կուսակցության գոյությանը։