Արդարադատության նախարարությունն այս տարվա սեպտեմբերին ցմահ ազատազրկման դատապարտված անձանց վիճակը բարելավելու վերաբերյալ օրինագիծ է դրել շրջանառության մեջ։ Այս մասին այսօր` հոկտեմբերի 14–ին, լրագրողների հետ զրույցում ասաց ՀՀ արդարադատության նախարարի տեղակալ Սուրեն Քրմոյանը՝ ընդգծելով, որ դա կապ չունի գործերի վերաբացման պահանջով հոկտեմբերի 12–ին 40-ից ավելի ցմահ ազատազրկված անձանց հացադուլ հայտարարելու հետ։
«Ցմահ ազատազրկվածների հետ կապված համապատասխան կարգավորումներ են նախատեսվել Քրեական օրենսգրքում և Քրեակատարողական օրենսգրքում։ Դա առնչություն չունի հացադուլի հետ, քանի որ դա մեր աշխատանքն է, դա մեր քաղականությունն է: Մենք հանդիպել ենք ցմահ ազատազրկվածների հետ, լսել ենք նրանց պահանջները և հորդորել ենք, որ իրենք իրենց խնդիրները պատշաճ ձևով ներկայացնեն»,- ասաց նա։
