Անհրաժեշտ է շարունակել թմրանյութերի հակազդմանն ուղղված քայլերը: Այս մասին, այսօր հոկտեմբերի 14-ին, ՀԱՊԿ անդամ-պետությունների թմրամիջոցների անօրինական շրջանառության հակազդման իրավասու մարմինների ղեկավարների համակարգող խորհրդի 17-րդ նիստի ժամանակ հայտարարել է ՀՀ ոստիկանապետ Վլադիմիր Գասպարյանը:
Վերջինս բացման իր խոսքում նշել է. «Ցանկանում եմ առանձնակի ընդգծել թմրամիջոցների անօրինական շրջանառության հակազդման իրավասու մարմինների ղեկավարների համակարգող խորհրդի դերը, որը հսկայական նշանակություն ունի հակաթմրամիջոցային պայքարի համաձայնեցված ռազմավարության եւ համատեղ միջոցների մշակման ու իրականացման գործում:
Հաշվի առնելով կուտակված փորձը՝ անհրաժեշտ է շարունակել թմրարտադրության հակազդմանը, թմրամիջոցների տեղաշարժի ուղիների հայտնաբերմանն ու կասեցմանը ուղղված համատեղ հակաթմրամիջոցային միջոցառումների իրականացման պրակտիկան:
ՀԱՊԿ անդամ-պետությունների թմրամիջոցների անօրինական շրջանառության հակազդման իրավասու մարմինների ղեկավարների համակարգող խորհրդի ջանքերով ձեւավորվել է բազմակողմ հիմքի վրա միջազգային համագործակցության մեխանիզմ, ձեռք է բերվել փոխըմբռնում պետությունների իրավասու մարմինների եւ դրանց շահագրգիռ գերատեսչությունների միջեւ»:
Նիստի օրակարգում ներառված էին թմրամիջոցների անօրինական շրջանառության հակազդման եւ համակարգող խորհրդի գործառութային ոլորտի մի շարք խնդիրներ:
Մասնավորապես՝ ներկայացվեց 2015 թ. երկրորդ կիսամյակում թմրամիջոցների անօրինական շրջանառության հակազդման համակարգող խորհրդի գործունեության հաշվետվությունը, քննարկվեցին ՀԱՊԿ անդամ-պետությունների հակաթմրամիջոցային գերատեսչությունների իրավասու մարմինների ղեկավարների հաշվետվությունները նույն ժամանակահատվածում կատարված աշխատանքի մասին՝ Աֆղանստանի տարածքից եկող համաշխարհային թմրասպառնալիքի դեմ պայքարում փոխգործակցության միասնական դիրքորոշում մշակելու վերաբերյալ առաջարկներով:
Նշենք, որ նիստին մասնակցել են Բելառուսի, Ղազախստանի ՆԳՆ-ների, Ղրղզստանի կառավարությանն առընթեր թմրամիջոցների վերահսկողության պետական ծառայության, Տաջիկստանի նախագահին առընթեր թմրամիջոցների վերահսկողության գործակալության, ՌԴ թմրամիջոցների շրջանառության վերահսկողության դաշնային ծառայության, Հայաստանի Հանրապետության ոստիկանության եւ ՀԱՊԿ քարտուղարության ներկայացուցիչները: