![](img/news/29/12/07/default.jpg)
Կասկած չկա, որ Ավետիսյաններին սպանել է Վալերի Պերմյակովը: Այս մասին այսօր՝ հոկտեմբերի 16-ին, լրագրողների հետ հանդիպմանն ասաց տուժողի իրավահաջորդի ներկայացուցիչ Լուսինե Սահակյանը:
«Երբ մենք ուսումնասիրում էինք փորձաքննությունների եզրակացությունները, արդեն իսկ նշվարվում էր՝ հանցագործությունը կատարողը Պերմյակովն է: Այսօր արդեն կասկած չկա, որ կրակոց արձակողը Պերմյակովն է եղել, հանցագործությունն ինքն է կատարել: Մինչ օրս մենք այլ տվյալներ չունենք երկրորդ անձի գոյության, նրան դրդելու մասին: Որեւէ ապացույցով նման տվյալ մենք չենք ստացել: Եթե նախաքննական մյուս նյութերն ուսումնասիրենք, լինեն ապացույցներ, որոնք կխոսեն այդ մասին, մենք միջնորդություններով հանդես կգան: Սակայն այժմ ամեն ինչ պտտվում է միայն Պերմյակովի անձի շուրջ, նույնիսկ ստի դետեկտորով է հիմնավորվում, որ իր ցուցմունքները սուտ չեն, ճիշտ են»,- ասաց Լուսինե Սահակյանը:
Ավետիսյանների իրավահաջորդների ներկայացուցիչները համոզված են, որ Վալերի Պերմյակովը դատապարտվելու է ցմահ ազատազրկման:
Նշենք, որ փաստաբաններն այսօր մանրամասներ են ներկայացրել ընթացող նախաքննության մասին:
Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով, դասալքության մեղադրանքով: