![](img/news/29/18/22/default.jpg)
Գյումրիում հունվարի 12-ին դաժանաբար սպանված Ավետիսյանների բակում բնակվող հարազատի համար տուն տանող երկրորդ ճանապարհն են բացել: Այս մասին NEWS.am-ի թղթակցին ասաց Շիրակի մարզպետ Ֆելիքս Ցոլակյանը:
«Սերյոժա Ավետիսյանի հորեղբոր աղջիկը, որն ապրում է հարեւանությամբ, մեզնից խնդրում էր տուն տանող երկրորդ ճանապարհ բացել, որն էլ մարզպետարանն իր միջոցներով կատարել է»,- ասաց մարզպետը:
Հիշեցնենք, որ հարեւանությամբ բնակվող՝ սպանված Սերյոժա Ավետիսյանի հորեղբոր աղջիկը դեպքից ամիսներ անց դեռ բնակվում էր հարազատների տանը, չէր կարողանում վերադառնալ իր տուն:
Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով, դասալքության մեղադրանքով:
Հայաստանի քննչական կոմիտեում արդեն ավարտվել է գործի նախաքննությունը: Մինչեւ այդ Պերմյակովին մեղադրանք էր առաջադրվել նաեւ Քրեական օրենսգրքի 104-րդ հոդվածի 2-րդ մասի 1-ին, 5-րդ, 8-րդ կետերով, 175-րդ հոդվածի 2-րդ մասի 3-րդ, 4-րդ կետերով եւ 34-329-րդ հոդվածի 1-ին մասով: