Համաշխարհային ֆինանսական ճգնաժամի պատճառով Ադրբեջանում կտրուկ անկում է ապրել ապահովագրական հատվածը,- գրում է ադրբեջանական «Զերկալո» թերթը։
Ըստ թերթի տվյալների, ընթացիկ տարվա առաջին կիսամյակի արդյունքներով, երկրի ապահովագրական ընկերությունների կողմից հավաքվել է 79 մլն. 890,33 հազար մանաթի ապահովագին, ինչը 18,38%-ով պակաս է 2008 թվականի միևնույն ժամանակահատվածի ցուցանիշից (97 մլն. 877,15 հազար մանաթ)։
Կյանքի ապահովագնի հավաքը անցյալ տարվա առաջին կիսամյակի համեմատ կրճատվել է 2,6 անգամ։ Իսկ ընդհանուր ապահովագների նկատմամբ կյանքի ապահովագրման տեսակարար մասը Ադրբեջանում ընթացիկ տարվա առաջին կիսամյակի արդյունքներով կազմել է 0,5%` նվազելով անցած տարվա առաջին կիսամյակի 1,06%-ից։
Մինչդեռ, ամենամեծ կորուստները կրել են ապահովագրական այն ընկերությունները, որոնք իրենց գործունեության մեջ շեշը դնում են հիմնականում ավտոմեքենաների ապահովագրման վրա։
Ինչպես նշում է թերթը, համաշխարհային ֆինանսական ճգնաժամի շնորհիվ պարզ դարձավ, որ երկրի ապահովագրական շուկան չափազանց սերտորեն է կապված բանկային հատվածին։ Ընդ որում, սռեղծվել է այնպիսի իրավիճակ, որ երկրի հենց բանկային հատվածը զգալիորեն ավելի քիչ կորուստներ է կրել, քան ապահովագրական ընկերությունները։
Առևտրային բանկերի կողմից ավտոմեքենաների գնման սպառողական վարկերի տրամադրման կտրուկ կրճատումը դարձել է ապահովագրական շուկայի փլուզման պատճառ։ Ավտոտրանսպորտային միջոցների ապահովագնի անկումը 2008 թվականի առաջին կիսամյակում կազմել է 14 մլն. 821,21 հազար մանաթ, կամ՝ ավելի քան երկու անգամ նվազել է անցած տարվա միևնույն ժամանակահատվածի համեմատ։ Իսկ դա, համապատասխանաբար, հանգեցրել է այն բանին, որ ավտոմոբիլային ապահովագների տեսակարար կշիռը 30,26%-ից ընթացիկ տարվա առաջին կիսամյակի արդյունքներով նվազել է մինչև 18,52%-ի։
