Ռուսաստանյան նենգորդները (հաքերները) այդ երկրի հատուկ ծառայությունների օգնությամբ գրոհում են Ադրբեջանից Եվրոպա (շրջանցելով Ռուսաստանը) գնացող նավթամուղերի համակարգչային սպասարկիչները։ Այս մասին, ինչպես հաղորդում է ադրբեջանական 1news.az գործակալությունը, հայտնել է ամերիկյան Aviation Week հրատարակությունը։ Հրապարակման համաձայն, արդեն երկար ժամանակ ռուսաստանյան հաքերները գրոհում են Բաքու-Թբիլիսի-Ջեյհան (ԲԹՋ) նավթամուղի սպասարկիչը։
Ինչպես նշվում է, նման հարձակումներից մեկի ժամանակ ԲԹՋ-ի աշխատանքը դադարեցվել է, և արևմտյան նավթային կոնսորցիումը ստիպված է եղել իր նավթն ուղղել ռուսական Բաքու-Նովոռոսիյսկ նավթամուղով։ «Սակայն ամերիկյան մասնագետների կողմից ԲԹՋ-ի սպասարկիչի վերականգնումից հետո նավթամուղի գործունեությունը վերսկսվել է»,- գրում է Aviation Week-ը։
Թերթի կարծիքով, նավթամուղերի համակարգչային ցանցերի այդ հարձակումները կատարվել են այն նույն հասցեներից, որոնցից հարձակման էին ենթարկվում էստոնական կայքերը՝ 2007 թվականի գարնանը տեղի ունեցած ռուս-էստոնական կիբեր-պատերազմի ժամանակ։ Պարբերականը նշում է, որ կիբերհանցագործությունների դեմ պայքարում մասնագիտացված ԿՀՎ-ի ու ՀԴԲ-ի մասնագետներն արդեն իրենց հսկողության տակ են վերցրել այդ նավթամուղների համակարգչային սպասարկիչներն, ու դրանք տեղափոխել Վաշինգտոն։