Չնայած սեփական սահմանների երկայնքով ունեցած անվտանգության մարտահրավերներին, Հայաստանի Հանրապետությունը հաստատակամ է նույն ծավալներով շարունակելու իր մասնակցությունը ՆԱՏՕ-ի «Վճռական աջակցությանը»՝ մինչեւ առաքելության ավարտը: Այս մասին, նոյեմբերի 23-ին, Բեռլինում ընթացող ՆԱՏՕ-ի հովանու ներքո անցկացվող «Վճռական աջակցություն» առաքելության Հյոսիսային հրամանատարության կազմում ներգրավված երկրների պաշտպանության նախարարների նիստի ժամանակ նշել է ՀՀ պաշտպանության նախարար Սեյրան Օհանյանը:
ՊՆ-ից NEWS.am-ին հայտնում են, որ նիստի ընթացքում կարծիքներ են փոխանակվել Գերմանիայի կողմից ղեկավարվող Հյուսիսային հրամանատարության պատասխանատվության գոտում տիրող անվտանգային իրավիճակի, խնդրահարույց հարցերի եւ առաջիկա անելիքների վերաբերյալ: Իր ելույթում ՀՀ պաշտպանության նախարարը հույս է հայտնել, որ միջազգային կոալիցիայի գործուն աջակցության շնորհիվ առաջիկայում Աֆղանստանում կարձանագրվեն տեւական խաղաղության եւ կայունության հաստատման ուղղությամբ նոր ձեռքբերումներ:
Բեռլինում ՀՀ պաշտպանության նախարարը երկկողմ հանդիպումներ է ունեցել նաեւ Բունդեսթագի պաշտպանության հարցերով հանձնաժողովի նախագահ Վոլֆգանգ Հելլմիխի եւ ԳԴՀ կառավարության կազմում Ռուսաստանի Դաշնության, Կենտրոնական Ասիայի եւ Արեւելյան գործընկերության երկրների հետ միջհասարակական համագործակցության հարցերի համակարգող Գերնոտ Էրլերի հետ:
Հանդիպումների ընթացքում քննարկվել են Եվրոպայում, Հարավային Կովկասում եւ այլուր տարածաշրջանային անվանգության եւ դրա առջեւ ծառացած սպառնալիքներին ու մարտահրավերներին, ինչպես նաեւ պաշտպանության ոլորտում հայ-գերմանական համագործակցությանն առնչվող հարցեր:
Սեյրան Օհանյանը զրուցակիցներին է ներկայացրել ԼՂ հակամարտության գոտում տիրող իրավիճակը, վերջին շրջանի զարգացումները եւ կարգավորման ուղղությամբ հայկական կողմի դիրքորոշումները: Բարձր գնահատելով պաշտպանության բնագավառում հայ-գերմանական համագործակցությունը, Սեյրան Օհանյանը նշել է, որ դրա արդյունքում երկու երկրների միջեւ ստեղծված փոխադարձ վստահության մթնոլորտը խթանում է նաեւ այլ ոլորտներում երկկողմ կապերի ու համագործակցության զարգացումը:
