Հայ-թուրքական սահմանը հոկտեմբերին հատած աֆղաններ Շոքաթ Ամինզան եւ Սեդիղոլլահ Ալիզադեն քննիչներին պատմել են, որ սահմանը հատել են՝ ապաստանի եւ կացարանի իրավունք խնդրելու նպատակով: Այս մասին NEWS.am-ին ասաց նրանց փաստաբան Մերի Ալավերդյանը:
«Այս գործն առանձնահատուկ է, քանի որ Շոքաթն ու Սեդիղոլլահն ապաստան են խնդրում: Ես արդեն դիմում եմ ներկայացրել Միգրացիոն ծառայություն, որտեղից պատասխանել են, որ հարցն ուսումնասիրվում է»,- ասաց նա:
Փաստաբանի խոսքով՝ երիտասարդներն Աֆղանստանի քաղաքացիներ են, իրենց ցուցմունքներում նշել են, որ իրենց երկրից են փախել եւ հայտնվել են երրորդ երկրում, նույնիսկ սկզբում չեն իմացել, թե որ երկրի սահմանն են հատում:
«Ես միջնորդել էի, որ առաջադրված մեղադրանքը փոփոխվի, սակայն նախաքննական մարմինը մերժել էր այն եւ մեղադրական եզրակացությամբ գործն ուղարկել դատարան»,- ասաց Մերի Ալավերդյանը՝ նշելով, որ օրենքով սահմանված է, որ եթե սահմանը հատած քաղաքացիները ապաստան են խնդրում, հարուցված քրեական գործն անմիջապես կարճվում է:
Նշենք, որ ըստ մեղադրական եզրակացության՝ Շոքաթ Ամինզային նախնական համաձայնության է եկել Սեդիղոլլահ Ալիզադենի հետ եւ հոկտեմբերի 6-ին հատել են հայ-թուրքական սահմանը, սակայն բռնվել են սահմանային ծառայություն իրականացնող աշխատակիցների կողմից:
Նրանց մեղադրանք է առաջադրվել Քրեական օրենսգրքի 329-րդ հոդվածի 2-րդ մասի հատկանիշներով: Խափանման միջոց է ընտրվել կալանավորումը: