Երեք կարեւոր գործոն կա, որոնց կիրառելու դեպքում Հայաստանը ԵԽԽՎ-ում չի հայտնվի այնպիսի իրավիճակում, ինչպես հիմա, երբ մեկը մյուսի հետեւից ընդունվում են հակահայկական զեկույցներ։ Այս մասին այսօր՝ նոյեմբերի 24-ին, Ազգային ժողովում լրագրողների հետ զրույցում հայտարարել է ՀԱԿ խմբակցության ղեկավար, ԵԽԽՎ-ում հայաստանյան պատվիրակության անդամ Լեւոն Զուրաբյանն՝ անդրադառնալով երեկ ԵԽԽՎ-ի սոցիալական հանձնաժողովի կողմից ընդունած Սարսանգի ջրամբարի մասին հակահայկական զեկույցին։
«Հարկավոր է երեք կարեւոր բան, որ Հայաստանի պատվիրակությունը պետք է անի։ Նախ՝ ուղերձը պետք է ճիշտ լինի։ Մենք պետք է խոսենք այն լեզվով, որը եվրոպացիները պետք է հասկանան, ոչ թե հայհոյենք ադրբեջանցիներին, փորձենք ամեն մի ասածին բուռն պատասխան տալ։ Հակառակը՝ այդ վեճի մեջ պետք չի մտնել, պետք է խոսել ՄԱԿ-ի անվտանգության խորհրդի բանաձեւերի լեզվով, պետք է իմանալ այդ փաստաթղթերը անգիր ու պետք է խոսել խաղաղության լեզվով, կոնֆլիկտի կարգավորման լեզվով»,-ասել է Լեւոն Զուրաբյանը։
Նրա խոսքով՝ երկրորդը մարտավարության հարցն է. «Շատ կարեւոր է հասկանալ, թե ինչի կարող ես հասնել, ինչի՝ ոչ։ Օրինակ բյուրոյի անդամների հետ իմ խոսակցությունները ցույց են տալիս, որ Ղարաբաղի հետ կապված զեկույցն արդեն պետք է կայանա։ Այսինքն՝ որեւէ տարբերակ չկար, բայց Հայաստանի իշխանությունները շարունակում էին դրա դեմ պայքարել, մինչդեռ դա արդեն լուծված հարց էր, եւ պետք էր կենտրոնանալ զեկուցողի անձի վրա եւ ալտերնատիվ զեկուցող բերել ու պաշտպանել նրան։ Ինչպես նաեւ վերնագիրը փոխելու ուղղությամբ պայքարել»։
Լեւոն Զուրաբյանի պնդմամբ, երրորդը համապատասխան օղակների կոորդինացիայի, համատեղ աշխատանքի բացակայությունն է։ «Ցավոք սրտի, բացակայում է նախագահի աշխատակազմի, ԱԳՆ-ի եւ ԵԽԽՎ հայկական պատվիրակության միջեւ կոորդինացիան։ Սա շատ կարեւոր էլեմենտ է, որովհետեւ եթե բոլորը ճիշտ ուղերձով եւ մարտավարությամբ աշխատեն այդ ուղղությամբ, կստանանք արդյունք։ ԵԽԽՎ-ում դա չկա, գործում է պատասխանատվությունը իրար վրայից գցելու, մյուսի վրա դնելու հոգեբանությունը»,-նշել է Զուրաբյանը։
