«Ընդդիմության միասնական շտաբի» ղեկավար Ժիրայր Սեֆիլյանն առայժմ ձեռնպահ է մնում մեկնաբանել շրջանառվող այն լուրերը, թե նախօրեին վնասազերծված ենթադրյալ հանցախումբը կապ ունի «Նոր Հայաստան» հանրային փրկության ճակատի հետ:
«Մի քիչ համբերենք, առաջիկա օրերին ես իմ կարծիքը մանրամասն կհայտնեմ կատարվածի հետ: Մի քիչ հետեւենք, թող մի քանի հիմարություններ էլ թույլ տան, ու ես իմ կարծիքը կասեմ»,-այս մասին այսօր` նոյեմբերի 26-ին, լրագրողների հետ զրույցում ասաց Սեֆիլյանը:
Հարցին, թե փրկության ճակատի դեկտեմբերի 1–ի հանրահավաքից առաջ հնարավո՞ր են արդյոք ձերբակալություններ եւ նախաձեռնության անդամների տների խուզարկությամբ զինամթերք հայտնաբերելու դեպքեր, Ժիրայր Սեֆիլյանը նշեց, որ չի բացառում նման դեպքեր:
«Ոչ մի բան չի բացառվում, բայց մենք մեր ուզածին հասնելու ենք առանց ձերբակալումների, ինչ որ պետք է, անելու ենք» ,- ասաց Սեֆիլյանը` կատակելով «Ինձ տեսնելուց անմիջապես զենք եք հիշում, չէ՞»:
«Ընդդիմության միասնական շտաբի» ղեկավարի խոսքով` դեկտեմբերի 1-ին Ազատության հրապարակում մեծ թվով երիտասարդներ են հավաքվելու, եւ հենց երիտասարդների ներկայությունն է իշխանափոխություն իրականացնելու բանալին:
«Մենք ունենք մեր առաջարկությունները եւ համոզված եմ, որ ժողովուրդը ընդունելու է մեր առաջարկություններից որեւէ մեկը, եւ մենք այդ նոր գտնված բանալիով վերջիվերջո կձերբազատվենք այս ռեժիմից, այս կեղեքող համակարգից: Ժողովուրդը պետք է գիտակցի, որ 25 տարի է անցել, այսօր նոր սերունդ գոյություն ունի: ԿԳԲ-ական ոճով երկիր կառավարելու մոդան անցել է: Ես համոզված եմ, որ առաջիկայում մեր երիտասարդությունը ապացուցելու է, որ ոչ միայն չի վախենում, այլեւ իր վճռականությամբ զարմացնելու է նաեւ աշխարհին: Դուք ականատեսը կլինեք դեկտեմբերի 1-ին, թե որքան երիտասարդներ ներկա կլինեն Ազատության հրապարակում»,-ասաց Սեֆիլյանը:
Ազատամարտիկը նշեց, որ փրկության ճակատը դեկտեմբերի 1-ից մեկնարկող անհնազանդության ակցիաների գործողությունների հստակ ծրագիր ունի:
«Մենք արկածախնդիրներ չենք, եթե ժողովրդին հրավիրում ենք մոբիլիզացիայի, բնականաբար ունենք ծրագիր, տարբերակներ, եւ այդ տարբերակների ընտրությունը պետք է կատարվի դեկտեմբերիր 1-ին»,-ավելացրեց Սեֆիլյանը:
