Դատարանը մեկ ամսով հետաձգեց Ավետիսյանների սպանության գործով դատական նիստը: Դատական գործընթացին միացած, ամբաստանյալ Վալերի Պերմյակովի երկրորդ հասարակական պաշտպան Էդուարդ Աղաջանյանը միջնորդել է դատարանին մեկ ամսով հետաձգել դատավարությունը, որպեսզի ծանոթանա գործի նյութերին, հաղորդում է NEWS.am-ի թղթակիցը (ֆոտոռեպորտաժ):

Միջնորդության կապակցությամբ կողմերը առարկություններ չեն ներկայացրել: «Մենք կանենք ամեն ինչ, որպեսզի չխախտվի Պերմյակովի պաշտպանության իրավունքը»,-հայտարարել է փաստաբան Լուսինե Սահակյանը, որը ներկայացում է տուժողների իրավահաջորդների շահերը: Նա նաեւ խնդրել է հաջորդ դատական նիստին աշխատանքի նորմալ պայմաններ ստեղծել:

Նշենք, որ դատարանում Պերմյակովի շահերը պաշտպանում էր հասարակական պաշտպան Արմեն Պողոսյանը, որի լիազորություններն ավարտվում են հունվարի 1-ին:
Դատական գործընթացն սկսվել է այսօր՝ դեկտեմբերի 18-ն, Շիրակի ընդհանուր իրավասության դատարանում, սակայն այն տեղի է ունենում ռուսական ռազմակայանի տարածքում:

Հաջորդ դատական նիստը տեղի կունենա հունվարի 18-ին, ժամը 12-ին:

Գյումրիում, ռուսական 102-րդ ռազմակայանի տարածքում, այսօր՝ դեկտեմբերի 18-ին, Երեւանի ժամանակով ժամը 12-ին մեկնարկել է Ավետիսյանների ընտանիքի 7 անդամին դաժանաբար սպանելու մեջ մեղադրվող ռուս զինծառայող Վալերի Պերմյակովի դատավարությունը: Դատավորն է Շիրակի մարզի ընդհանուր իրավասության դատավոր Հարություն Մովսեսյանը։

Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:

Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:

Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով: