Գյումրիում Ավետիսյանների սպանության գործով դատաքննության ընթացքում հայկական կողմն ակնհայտորեն սահմանափակված է ռուսական գործողություններով: Այս մասին այսօր` դեկտեմբերի 21-ին, լրագրողների հետ հանդիպմանն ասաց Ավետիսյանների սպանության գործով տուժողի իրավահաջորդի ներկայացուցիչ Արթուր Սաքունցը:
«Առաջինը` դատաքննությունն անցկացվում է արտագնա նիստի տեսքով ռուսական ռազմաբազայում: Երկրորդ` նիստին ներկա են ռուս զինծառայողներ: Այս ամենը նշանակում է` ռուսական կողմը հսկում է հայկական դատը: Մենք համոզված ենք, որ դատավորի նկատմամբ կարգապահական վարույթ կհարուցվի»,- ասաց Արթուր Սաքունցը` նշելով, որ վարույթ պետք է հարուցվի նաեւ Դատական դեպարտամենտի նախագահի նկատմամբ:
Սաքունցի համոզմամբ` Հայաստանի նախագահը պետք է հսկողություն իրականացներ, որ դատաքննությունն անցկացվի արդար: Հակառակ դեպքում, ըստ իրավապաշտպանի, Պերմյակովն ազատ չի լինի իր պատասխաններում, ցուցմունքներում եւ կխորացնի վարկածները, որ ռուսական կողմն ունի թաքցնելու բաներ, իսկ հայկական կողմն անտեսում է ՀՀ օրենսդրությունն ու աջակցում է այդ երեւույթները թաքցնելուն. «եթե հունվարի 18-ին նույն պայմանները լինեն, ապա մենք կմիջնորդենք, որ նիստերը տեղափոխվեն Հանրապետության ցանկացած այդ դատարանի շենք»:
Հիշեցնենք, որ Պերմյակովի գործով դատավարությունը դեկտեմբերի 18-ից սկսվել է: Գործով տուժողի իրավահաջորդի ներկայացուցիչները դժգոհում են, որ նիստն անցկացվում է ռուսական ռազմաբազայում, քանի որ պայմաններ ստեղծված չեն աշխատանքի համար: