ԱՄՆ նախագահ Բարաք Օբամայի ծրագրերը նպաստել են ԱՄՆ պետական պարտքի կտրուկ մեծացմանը։ Ինչպես գրում է Financial Times Deutschland-ը, այսօր այն ամերիկյան ՀՆԱ-ից շատ ավելի արագ է աճում, և նման քաղաքականության շարունակման դեպքում 5 տարի հետո կարող է հասնել ազգային ՀՆԱ-ի 100%-ին։
Նախագահ Բարաք Օբաման, շարունակում է պարբերականը, կհայտնվի առավել մեծ ճնշման տակ՝ բյուջեի կանխատեսվող դեֆիցիտի ավելացման պատճառով և ստիպված կլինի կրճատել ֆինանսավորման ծրագրերն ու սոցիալական փաթեթների համար նախատեսված ծախսերը։ Մի շարք հանրապետականների կողմից արդեն վաղուց քննադատություն է հնչում Օբամայի քաղաքականության հասցեին։
Հոդվածագիրը կոչ է անում ԱՄՆ վարչակազմին ճշգրտել բյուջեի դեֆիցիտի վերաբերյալ իր կանխատեսումները առաջիկա 10 տարվա համար։ Ըստ պաշտոնական կանխատեսումների, այդ ընթացքում այն կհասնի շուրջ 20 տրլն. դոլարի։ Մյուս կողմից, նշվում է հոդվածում, ԱՄՆ տնտեսության փրկությանն անհրաժեշտ ֆինանսական ծախսերի ճշգրիտ գումարը մինչ այժմ անհայտ է։ Որոշ փորձագետներ նշում են բանկերի փրկության, ավտոմոբիլային ոլորտի ու հասարակական երաշխիքների համար նախատեսված 23,7 տրլն. դոլարի գումար։
Հենց նման գումար է նշվում ԱՄՆ Կոնգրեսի Ներկայացուցիչների պալատի պատգամավորների համար պատրաստված Նիլ Բարոֆսկու զեկույցում, որը ղեկավարում է խնդրահարույց ակտիվներից ազատվելու պետական ծրագիրը։ Այդ գումարն իրենից ներկայացնում է ոչ թե կոնկրետ ծախսերը, այլ երկրի տնտեսության մեջ պետական բոլոր ինտերվենցիաների գումարը։ Ինչպես եզրափակում է պարբերականը, վարկանիշային շատ գործակալություններ սկսում են կասկած հայտնել Միացյալ Նահանգների նկատմամբ AAA-ի առավելագույն հուսալիութան վարկանիշի կապակցությամբ։