Գյումրիում Ավետիսյանների սպանության գործով տուժողների իրավահաջորդների ներկայացուցիչները պատրաստվում են որոշակի փաստաթղթերի վերաբերյալ միջնորդություն ներկայացնել: Այս մասին այսօր՝ հունվարի 18-ին, ռուսական 102-րդ ռազմաբազայում կայացած դատական նիստից հետո լրագրողների հետ զրույցում ասաց տուժողի իրավահաջորդի ներկայացուցիչ Լուսինե Սահակյանը՝ նշելով, որ այլ մանրամասներ հաղորդել այս պահին չի կարող:
Փաստաբանը հույս հայտնեց, որ այդ միջնորդությունը գոնե դատարանը կբավարարի:
«Մինչեւ այս ներկայացված միջնորդությունները դատարանը կարծես թե դիտարկում էր որպես տեխնիկական խնդիրներ, ինչը սակայն, այդպես չէր, իսկ առաջիկայում ներկայացվելիք միջնորդությունները էական նշանակություն ունեն եւ եթե դատարանը չբավարարի դրանք, ապա նշանակում է, որ ինքը չի ցանկանում, որ իրականությունը պարզվի»,- ասաց Լուսինե Սահակյանը:
Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով:
Հայկական կողմը դեկտեմբերի 18-ին սկսել է դատավարությունը: